Ni kecha aibelena mali: Sushma Swaraj

New Delhi August 12 (Agencies) : Parliament senden tembangtsü joko anogo ana dang anünga lia tanü Congress-i senden nung External Affairs Minister Sushma Swaraj densema aliba Lalit Modi ken o nung o atsüteptsü/tokteptsü atema melaa liasü.
Tanü tashi Congress-i Lalit Modi ken o nung Sushma aser Vyapapam ochimashi ken o nung Rajasthan Chief Minister Vasundhara Raje aser MP Chief minister Shivraj Singh Chouhan nunger pei menden nungi aludaktsütsüla ta akhanger.
Ochimashi ken o nung India-i bushia alisang, Lalit Modi nem visa agütsütsü atema Sushma-i yariba dak sentakba ken o nung lai, “Ni kecha aibelena mali,” ta shiogo.
Swaraj-isa, Congress-i Bofors ken o nung aibelensang Ottavio Quattrocchi aser Bhopal gas leak ken o nung aibelensang Warren Anderson nunger India nungi jendaktsütsü asoshi yariogo, ta aitsü.
Laisa, “Rahul Gandhi-i mapang shia sodi agir. Ni pa dang ya shiner, sodi agiang aser pai par kibong puti otsü züngang. Aser pa kodang meyipa arudir pai, oja asenoki Quattrochi dang nungi sen kwi agi, ta asüngdangang,” ta ashi.
Ajisüaka lai jembiba oji magizükteti Congress tatong Tir Rahul Gandhi-i Ato kilonser dang, sendeni arutsü asoshi tayongzükba agütsütsü.
Finance minister Arun Jaitley-ia Congress aija, Lalit Modi ken o nung Congress-i yimyim tai ayimer aser Sushma aitsübaji sorkari magizüker, ta ashi. “Parnoki yimyim tazüngla nungjagi taliba kecha meinyaktettsü. Parnoki ken o tajung magütsüteter,” ta ashi.
“Item taitsüba ajungaji sorkari magizüker. Sushma menden nungi alutsüji madoker,” ta Jaitley-i sangdongba sülen Congress züngsemtem lungkak aita senden nungi ayazük.