Telok asem tezüngzüktep agibaji mera tajung ka liasü: Angh

Kohima, February 07 (TYO): Nagaland Angh, P.B. Acharya-i Chief Minister, T.R. Zeliang aser par Cabinet züngsemtem den tang tensa indang o lemtepogo, aser iba mapang nung Angh-i parnok dang iba tebilemtsü ya ken o lemtepba ajanga bentetang, ta ajungshi, ta tanü Raj Bhavan sangdong ka ajanga metetdaktsü.
Tanü Angh-i Nagaland Baptist Church Council (NBCC)-a jaoka senden amen aser iba mapang Angh-i parnok dang, January 30 nung telok asem tsüngda tezüngzüktep agitsü atema inyakbaji mera tajung ka liasü ta ashi.
Angh Acharya-isa, General Secretary, Dr. Zelhou Keyho-i aniba NBCC ketdangsertem dang, maneni yimjung atema inyaktsü merangang, kechiyong sorkar office tem mapa meinyakba ajanga nüburtem timtemer aser itasena magütsür, ta mepishia metetdaktsü, ta Raj Bhavan sangdong nungsa shia lir.
State Angh-isa mulungtet teloktem, Tribal Hohos, Nagaland Tribes Action Committee (NTAC) aser lokti tentettem dang ken o lemtepba ajanga lenmang tajung ka bushitettsü merangdaktsüner, ta mepishia metetdaktsü.