Nübur, JCC, NBCC anema inyaka lira tatok meshir: TR Zeliang

Kohima, February 07 (TYO): Tanü Nagaland Chief Minister, TR Zeliang-i, tang state nung tensa ya Municipal aser Town Council elections nung public-i tetsür nem shilem 33% lemzüktsüba anema nokdakba dak alia ogo aser yimtenren inyakyim ka kümogo, ta ashi.
Tanü nikongdang State Banquet Hall, Kohima nung osangbenertem den jembidang, nija mesüra telok kecha metetshii Zeliang-i, tajangzük angutsü atema kari public movement nung maongka agir aser yimtenren tensa ka kümdaktsür, ta ashi.
‘Kija atema bilema inyakba’ mesüra ‘yimtenren ajanga anishir” ta asübaji kechi, ta asüngdangba langzüdang pai shinga metetshi saka, “Iba ya shiba ajanga’ar nüburtemi kobi melii metettsü,” ta langzü.
“Item tatalokba nung nisung kari tajangzük bushi ka mesüra, nüburtemi yamaibo masütsü,” ta TR Zeliang-isa shisem.
“JCC mesüra kin tentettemi election thitemdaktsünüa liasü, aser ibaji sorkari inyakogo aser election dak sendakba maparen inyakbatem ka danga magitsü ta lemtetogo, saka tang tashi Chief Minister dang menden nungi alung ta akhangba tetezüji, nisung kari tajangzük bushir,” ta paisa metetdaktsü.
Zeliang-isa, pa anentsü atema akhangbaji kari tajangzük atema yimtenren inyakyim benokba lir, kechiyong sorkari election maparen ajak agienogo aser iba tatalokba sadema bushisüngdangtsü atema Dimapur Police Commissioner aser Deputy Police Commissioner transfer yokba ajanga kin hohotemi akhangba ataloktsüogo, ta ashi.
Paisa ashiba agi, tetsürtem nem shilem 33 lemzüktsüba nung tetsür candidate kari tenüng agütsü, saka tesülenbo parnoki tenüng agiener parnokia election agitsü anema inyak.
“State nung kin tentet aikati tamasabo tetsürtem nem shilem 33 lemzüka ULB election agitsü mulunga liasü, saka tesülenbo iba onük nungi parnok atsüngadok,” ta TR Zeliang-isa shisem.
Chief Minister-isa, January 30 nü Dimapur nung statement ka nung sign asüba ajanga tribal tentettem aser sorkar tsüngda mangatettep adok, ta ashi.
“Anungji, state tesem ajak nung ULB election thitemtsüji menüngdak ta bilem, anungji onoki tensa junga aliba nung election agitsü mela aser ULBs tenet nung election athi,” ta paisa ashi.
“Onok mera tajungji junga meratet, kechiyong parnoki Nagaland tesem ajaklen election thitemtsü ta bilem. Parnoki tetsür nem shilem 33 shiteta yutsübaji mulungra tensa junga aliba tesemtem nung election agiba ajanga timtem malitsü ta onoki bilem,” ta paisa shisem.
“Anungji onoki item nisungtem, NBCC aser JCC anema inyaka lira, aser iba tatalokba ya iba ama mangatettep ajanga süra, ni sorkar tenüng nung tatok meshir,” ta TR Zeliang-isa ashi.
“Sorkar tangatetbaji tebilemba tajung nung liasü, ajisüaka ibaji tai angatet aser iba ama tatalokba ajanga lanur ana asü aser iba atema ni sasa bilemer aser sorkar tenüng nung tatok meshir,” ta paisa shisem.
CM menden nungi anentsü akhangba dak sentakba nung Zeliang-i, “MLA timbakati ni anema nokdakra ni anentsü mulunga lir, saka assembly tema nungi ni anenang ta akhangba ajangabo ni manentsü,” ta ashi.
Zeliang-isa, Arogo tentettem lenisüba kübok Bodhbarnü state nung kin tentettem, JCC aser NTAC Kohima den senden amenba aser Brihostibarnü Naga Hoho, Central Nagaland Tribes Council, Eastern Nagaland Peoples’ Organisation aser President GBs Federation den senden amenba ajanga iba onük bentettsü imlar, ta metetdaktsü.