China-i nisung mang nungi shilemtem agiteta shibelenba nokdangtsü

Vatican, February 8 (Agencies) : China-i par linük nung nisung temang nungi shilem balala agiteta shibelenba aser transplant tourism anema inyaktsü ta metetdaktsüogo.
Pontifical Academy Summit (PAS) sentong nung China linük nungi organ donations aser transplantations indang osang ka metetdaktsüba sülen China-i iba tenangzükba agiogo.
Iba sentong ya Vatican nung Pontifical Academy of Sciences ajanga ayongzük aser idangji China National Organ Donation & Transplantation Committee, Chairman & Professor, Huang Jiefu-i par linük indang sentong tasen osang lemsatep.
China nung tepuokdak lia asürtem mang nungi temesen aser tezüngjang agiteta tangar nem agütsür aser 2010 o 2016 tsüngda transplant 27,600 tashi liasü. Iba indang osangji China nung Ministry of Health-i World Health Organization (WHO) nem metetdaktsüogo, ta Jiefu-i ashi.
2015 küm tetenzüklen nungi China-i tepuokdak lia asürtem mang nungi shilem kecha magizüktsü atema tetuyuba agütsü, ta paisa shisem.
Küm shia bendanger noklang aika transplant tourism atema China-i aru saka 2009 küm China sorkari tenokdangba agütsüba sülen mali kümogo.
2007 nungi 2016 tsüngda China ketdangsertemi joint task force tem tentet aser ozüng alema transplant asüba 32 apu, medical reju 18 bushisüngdang, aser medical nisung 50 dena nisung 174 tashi aija tepuokdak ayu, ta Huang Jiefu-isa metetdaktsü.
Pontifical Academy Summit (PAS) nung linük balala nungi scientist, mongin nisungtem aser ketdangser 70 den tema aden aser parnoki alima nung ‘organ trafficking & transplant tourism’ nokdangtsü atema tebilembatem lemsatepa ozüngtem yanglu.