Sarbananda Sonowal-i Sarma tenüng asang

Guwahati, February 8 (Agencies): BJP-i aniba sorkar-i benokba mezüng budget ya nüburtem atema budget lir, aser iba ajanga lokti nung shilem ajunga ajangzüktsü, ta Assam Chief minister, Sarbananda Sonowal-i ashi.
Iba budget nung talisa tetsür, tanur aser matamabensartem atema jenjang tajung renemja lir, ta pai shisem.
Sonowal-i maneni state nung terenlok bener arutsüba nükjidong den tapet budget renema bener aruba atema finance minister, Himanta Biswa Sarma tenüngsang agutsü.
Lokti ajaki iba budget kanga molunga agizükogo. Financial & banking management mongin, Samir Baruah-i, iba budget ya state tejakleni anir aotsüba budget ka lir, ta ashi.
“Plan aser non-plan tem indokba ya jenjang tasen ka lir. Banking industry-a iba den meneptepa aintsüla. POS aser ATM tem nung entry tax agienba ya DigiDhan melas ajungkettsü merangba nung jenjang tasen ka lir,” ta taoba mapang Indian Overseas Bank nung general manager, Baruah-i ashi.
“Lanur shishilembatsü tenzükertem atema shilem tang aliba dang nungi timba imlaa liasü, kechiyong ibaji ajanga senotsü ren nung tali ajungketla aser mapa bushirtemji mapa agütsürtem kümla. Ajisüaka taküm budget ya kanga tajung,” ta Sunit Jain-i ashi.
Item tenüngsangtem aika liaka, All India United Democratic Front-ibo nübo agi tangar memenepertem telok asoshi kecha meinyakba atema Sarma aitsü.