Tripura nung Citizenship bill anema nokdak, nisung 50 yiru

Agartala, February 08, 2017: BJP-i aniba NDA sorkari Tripura Tribal Areas Autonomous District Council (TTAADC) nung Citizenship (Amendment) Bill- 2016 benokba anema Bodhbarnü Tripura yimtiba, Agartala nungi kilometer 27 pilar Khumlwang nung Tripura Indigenous Regional Party’s Forum (ATIRPF) züngsemtemi anepdang nungi nikongdang tashi gari lenmang mokdangba mapang police-i longkak aiter kar pua anir aoba noksa nung angur.

Agartala, February 08 (Agencies): Centre-i taoba küm Lok Sabha nung ‘citizenship bill’ benoka aliba anema tanü tribal telok asem-i Tripura ajunga ghonda 12 mokdangba ajanga state nung ruling aser opposition telok rara adok aser iba mapang nisung 50 yiruogo, ta police ajanga ashi.
Centre sorkari benoka aliba Citizenship (Amendment) Bill, 2016 anema tribal opposition telok asem longjemer Tripura Tribal Areas Autonomous District Council (TTAADC) tesem ajunga mokdang.
“Iba tenokdangba nung pusemer aser ruling Left party purtem Tripura nung tesem trok nung rara adok aser iba mapang nisung 50-shi yiru aser item rongnungi nisung pezü kanga mejungi yirua sorkar mozüki nung lir” ta police ajanga metetdaktsü.
“Tripura nung shishilembaba tesem, sorkar kaketreju aser office balala raksatsür nisung 1,200 tesem balala nung police-i apu,” ta ketdangser kati ashi.
“Sabroom, Karamchara, Machli, Manu, Khumulwng nung aliba TTAADC headquarter tesemtem nung iba rara ya adok,” ta police-isa ashi.
Iba mokdangba ajanga Tripura nung train jajaba kongshi aser TTAADC tesem nung aliba office, kaketreju, bank aser shishilembaba tesem aika shibang.
TTAADC tesem ajunga nung mitkartem yua lir, aser TTAADC ya Tripura nung aliba district ti prongla nung kongshir.
BJP-i aniba NDA sorkari iba bill benokba anema nokdaktsü asoshi INPT, IPFT aser NCT külemi longjemer taoba ita nung All Tripura Indigenous Regional Parties Forum (ATIRPF) tentet.
Pakistan, Afghanistan aser Bangladesh nungi kuli tejangja makaba Hindu, Sikh, Buddhist, Jains, Parsi aser Khristanpurtem India nung jenoka alir nem India senso temeten agütsütsü asoshi taoba küm iba bill benoka liasü aser tang iba bill ya parliamentary committee ka ajanga asadangsar.
Indian Constitution nung Sixth Schedule kübok aliba ama tribal nisungtem indang yimsüsüba, rongsenkettsüng aser sobaliba kümzüktsü aser wazüka ayutsü nükjidong nung TTAADC ya 1987 küm tentet. Tripura ali tasazük 10,491 sq km nungi shilem asemsü nung iba telok yagi ana kongshir.
“Citizenship (Amendment) Bill, 2016 ya Parliament nung agizükra, iba ajanga Tripura nung aliba lisopurtem aser tanga NE state nüburtem asoshi timtem agütsütsü,” ta ATIRPF Convenor, Narendra Chandra-i osangbener dang ashi.
“Tang benoka aliba ozüng ajanga Bangladesh nungi arurtem-i India nung east aser northeast tesemtem nung arua alitsü aser iba ajanga shidakba lisopurtem temeten ajak bener aotsü,” ta lenirisa ashi.
Tripura nung tribal nisungtemi yimtenren nung tongti shilem agir, kechiyong assembly menden 60 aliba nung shilem asem nungi shilem ka parnok atema lir aser Lok Sabha nung menden ana aliba nungi ka tribal atema lir.
TTAADC nem tashi tuluba agütsütsü, tribal nisungtem kümzüktsü asoshi Tripura nung ILP amshitsü, tribal oshi Kokborok ya Constitution nung 8th Schedule kübok inoktsü aser Tribura Assembly nung menden tesadang tribal nisungtem nem lemzüktsütsü asoshi item telok asemi akhanger.
CPI-M-i aniba Left front, Congress aser Trinamool Congress teloki Tripura sorkar nung yimsü asür, aser parnoki Citizenship bill anema nokdaker aser Tripura mokdangba aitsür.