Pei sasa meranga inyaker anguba rongsenjisa tanangba

Mokokchung, Feb 8 (TYO): Sorkar mapaji ang mapa masü aser sorkar mapaji ajakibo mangutsü, anungji, tanü putu nung peii kechi inyaker iba nungji temulung agüja tepok sünga alitsübaji kanga tongtibang lir, ta Mokokchung town nung tsüngko/jenko sü ayoker Ungmatsür Wt. N. Abenla den iba osangbeneri ajurutepa jembidang lai ashi.
Tangar dak metaloka melii pei sasa mapa meranga inyaktsü tim, “peii asentzü sena inyaktetba rongsenjisa tanangba, yangji tepela lir aser iba tepelaji ulura aser kecha dena medemdangtsü makok”, ta lai ashi.
“Koba mapa nung südir süaka, ajemalua tila kümer mapa meranga aser nendaka inyaktsü nüngdaker, aji süra, Tsüngremia memoatsüiang malitsü”, ta laisa ashi.
Iba mapa nung ya tajangzük kanga tulukabo mali, aji saka, iba ajanga nüburtem nem service tajungtiba agütsütsü aser ibai nübur tenzükba mapa ka lir, ta lai shisem.
Iba osangbenerisa la dang “iba mapa inyakdang timtem ajuruba kar lemsateptsü asü?”, ta metetnüa asüngdangdang, mapang shitak nung mechiyunger, shitak nung memejanger, tangar mesakdang saker. Aji oda, tangar dak metaloka melii peisasa meranga inyaktsü tejangraba nung iba ya inyaker, ta lai langzü.
Tanü liso business inyaker aikati noklang nung noklang tajangzük (laab) angutsü dang merangteper, iba yongji business junga meinyakteti asüba kuli aika lir aser iba mulungsentsüji memelen tashi asenok business tsütsü kodanga tejakleni maintsü, anungji, tajangzük kangabo mebushii aremzüka aser ochi shia inyaktsüla, ta laisa tebilemba ka lemsatep.
Iba osangbenerisa ano kasa sü ayoker Ungmatsürsa Wt. Sakulemla aser Wt. Arenkala tena den jembidang, küm semer dak tali iba mapa ya inyaker, ta ashi.
Taoba mapangbo Mokokchung nung ibala mapa inyaker kangabo bulua maliasü, saka tanü asüng dokan aika lapoka aoba den tetoktepba onsara asünung, bilemba ama meyokteter. Anogo shia amener saka khenkhenbo kata meyokteter, ta tenadisa ashi.
Parnokisa ashiba agi, ang (ang sü)-ji tzümar dang nungi alir aser ibaji yimdak sütaker kar nem takdaktsür, aser tsüngkojia yamaji kar nem yangludaktsür. Sü ka renemdang sen tajemba agi 1200-1300 shi indoker aser tayokba jenjangji 1600/-, 1800/- & 2000/- (tapu asem) tashi nung ayoker aser tsüngko jenjangji 350/- nungi 600/- (tapu asem) tashi lir. Ang dak alaka tanüngba mapa ajak liso nisungi dang inyaker, ta parnokisa shisem.
Sorkar nungi teyari kecha melii tanü tashi yamaji asentzü sena inyaka arudaki, ta tenadisa ashi. Tsüngremi anema yutsü tashi iba mapa ya maneni inyaktsü tebilemba lir, ta parnokisa shisem.
Iba ama sü yoka kibong mesütsüba mapa ya bilemdangra kanga tezübabo masü. Aji saka, koba mapa südir süaka, mulungteter inyakba nungji takok süngjang lir ta asenoki angateter.