NPMHR-i CM dang menden toktsütsü ayongzüker

Dimapur, February 8 (TYO) : Naga nunger lanur ana- asür Thejavizo Metha aser asür Bengdangnungsang Longkumer na tepsetba aser ano ULB Elections dak sendakba nung yirur Tsapise Sangtam asüba sülen Nagaland Chief Minister, T.R. Zeliang-i pa menden metoktsütsü ta tekong meranga nokdakba ajanga tanü asen Naga loktiliba nung tensa kanga tamajung ajurua lir, ta Naga Peoples Movement for Human Rights (NPMHR)-i sangdong ka nung metetdaktsüogo.
Naga nungertemi India nunger jakdang anogo ka jelia, August 14, 1947 nü Independence Day sangdong, ajisüaka tetenzük nungi tanü tashi state sorkartemi India Linük Temzüng tenüng nung ammeter, nübortem taginüba nembangtsütsü meranga arur, saka ibaji nüngdak mali, ta NPMHR-isa ashi.
Tang sorkar lenisüba kübok Naga Public aser State sorkar tsüngda tekong merangtepba ajanga Nagaland kübok tesem balala nung nisungtem kanga timtemer. Taruba anogo mesüra hopta ishika tsüngda iba tensa ya kasa dang ora, Naga nunger tanurtem aika shisaluyimba wadang nung takoksa ajurutsü aser iba takoksaji tatok meshiba mesüra kuli agütsüba ajanga tanaben tajungba mekümdaktsütettsü. Iba atema tanü lennirtem ajaki tebilemtsü abentsü, ta NPMHR-i sangdong nung metetdaktsü.
Iba tensa tajungba kümdaktsütsü atema Chief minister-i pa aibelena ali nunga mesüra mali nunga, pai tebilemtsü khuret bena pa menden nungi alutsüla, kechiyong democratic linük aser lokti ajak nung lennirtemi iba amaji inyaka arur, ta NPMHR-isa metetdaktsüogo.
NPMHR-i tasür kibongtem den asüku lemsateper aser sorkari tashiyim mapa aitsür, ta sangdong nungsa shia lir.