Chief Minister-i lennirtem den consultative meeting amen

Kohima, February 8 (TYO) : Nagaland Chief Minister T R Zeliang-i tanü state nung tang ajurua aliba tensa atema public lennirtem den senden ka ayonga amen.
Nagaland state nung urban local bodies (ULB) elections ajanga ashishitep ken o adokba aser item onük komaser angatetteptsü ta shisalen lemsateptsü atema T R Zeliang-i Naga kin hoho tem nungi lennirtem den senden ka amentsü ayongzük.
Ajisüaka, Nagaland Tribes Action Committee (NTAC) Kohima aser Joint Coordination Committee (JCC) nati yashi Chief Minister TR Zeliang-i menden metoktsü tashi pai ayongba senden ka nungdanga Naga lennirtem madentsü tetuyuba agüja liasü.
Tanü Chief Minister’s Office osang ka ajanga ashiba agi, Chief Minister-i ayongzüba senden nung Naga nunger lennir 50 shi ka aden aser parnoki ghonda asem shi tang state nung tensa ajurua aliba dak sendakba onüktem lemsatep.
Senden nung telemtetba agitsü atema masü saka public nem sorkar indang jenjang angatetdaktsütsü atema aser tang tensa ajurua aliba angatetteptsü atema lenmang bushiteptsü atema liasü, ta CMO osang ajangasa metetdaktsü.
Senden nung Chief Minister den par cabinet züngsemtem aser MLA temi yaritepa public nem sorkar jenjang angatetdaktsütsü merang, ta CMO osang ajangasa shisem.
Ano külen, NTAC Kohima osang ka ajanga ashiba agi, yashi coordination meeting nung lemtetba ama tanü CM den senden nung Naga kin lennir shinga maden.
Asüng, Chief Minister-isa anepdang 11:00 ako nung State Banquet Hall nung Naga Hoho, Central Nagaland Tribes Council (CNTC), Eastern Nagaland Peoples’ Organisation (ENPO) aser Gaon Burahs (GBs) Federation President nunger den senden ka amentsü ayonga lir.