British Referee kati Sikh Footballer ka Bandana meser asayatsü memela

London, February 8 (Agencies): England amateur team ka nung British Sikh footballer ka par yimsü ama ‘turban’ melen “bandana” meser asayatsü referee-i memela.
Taoba ita Leicester Nirvana nungi striker Gurdeep Mudhar, East Anglian nung Huntingdon Town Football Club den asaya metenzük tsüngta, par tamangba yimsü ama tekolak nung sü meser aliba salatsü asoshi referee-i tetuyuba agütsü, saka teloki pa meteni masayatsü ta nokdakba sülen referee-i pa telemtetba nungi atsüngin.
“Pa teti bandana meser asayar. Pa tekolak nung sü meser asayaba atema kecha nunga tebilemtsü melai aruogo saka referee pa dangi or ‘na sü meser masayadaktsütsü’ ta ashi. Referee yagi football asayatsüba yimyatem dak alaka kecha memetet südi. Aji saka Gurdeep atema kanga dang maksü liasü. Tanungba asayartemi pa pusema parnoka masayatsü lemtet,” ta Zak Hajat-i ashi.
January 21 nü iba asaya nung par teloki goal 2 agtsüba anaprongla Gurdeep-i idaktsü.
Club-i iba referee dak sendakba nung Football Association (FA) dangi tarutsü nung yamala teimmasüba lendong madoktsü asoshi ken o ka benokogo.
“Nirvana ya linük nung kin temeyoktep aliba club ka lir, aser sobaliba mangatetba ajanga onok iba jenjang nung toktsüogo,” ta Leicester Nirvana-i osang ka ajanga metetdaktsü.