Gautam Gambhir-i Dingko Singh nem teyari agütsü

Imphal, February 09 (Agencies) : India nunger nüngtugu Cricket asayar Gautam Gambhir-i Asian Games nung tsüngtepba nung gold medal angusang Dingko Singh nem teyari agütsü. Pa tang Imphal nung chemotherapy agitsüba lir.
Dingko shiba Sports Authority of India nung coach lir, pa temesen nung ‘bile duct cancer’ puteta shilem 70 intokogo.
“Dingko pa kisüng tashidak raratsü asoshi toktsüba ya kanga dang meinprongtsüka lir. Asayar nisung ka yamai asenoki senzüka toktsüba ya kanga majung. Pai Asian Games nung gold medal, Arjuna aser Padma Shri Award nguogo. Pa anepalutsü asoshi lenmang karbosa alitsü. Nibo ni inyaktetba ka inyakogo, aser yimjak nung iba osang temai madokdaktsüner,” ta Gambhir-i osangbenertem dang ashi.
Anogo ana tejakdang Union Sports Minister Vijay Goel-i Dingko yaritsü asoshi nangzük, saka iba mapa nungbo pa New Delhi nung temang anepalutsüba jenjang sakraraba agi Imphal-i belenadoker liasü.
“Onok jenjang kanga tasak asüba agi Imphal-i aru, aser pa chemotherapy agitsü asoshi mozüki ka nguogo,” ta pa kinungtsü Babai-i osangbenertem dang ashi.
“Ni pa yashi ajuruogo, aser pa temang tang tashibo junga lir. Onoki takok tashi pa nungitdar,” ta Dingko indang coach Ibomcha Singh-i ashi.