Lotha Hoho-i tribal tentettem aitsür

Dimapur, February 09 (TYO): Naga tribe organisation bangzüng anema February 8, 2017 nü TR Zeliang-i ayongba senden nung adener tribal tentettem sashia aitsür, ta tanü Lotha Hoho (LH) mendenbuba, Mhao Humtsoe aser tongti tezülur, Er. Mhondamo Ovung nati sangdong ka ajanga metetdaktsü.
Item tribal tentettemji Nagaland nung Naga nunger medeni balaka alitsü akok asü?, ta parnoki asüngdang.
“JCC/NTAC aser tribe nüburtemi item tentet mesüra züngsemtem anema tapet inyaktsüla. Iba ama tashioktsüba ajanga mapangmapang shia Naga nunger nükjidong tezüleni aoer, anungji Naga nunger tangatetertem aser Naga nunger atema chichi bilemtsür ajaki parnok aitsütsüla,” ta LH sangdong nungsa shia lir.
Lotha Hoho-isa, “NLA Speaker, Chotisuh Sazo dang, pai “tentet kari takhangba agüja temzüng alema House nung shimtetba lenir ka” ta jembiba nung “tentet kar” ta jembibaji kechi? ta pa dang asüngdangtsüsa akümer. Pa dang ya jangjashitsüner, tang tendak Naga nungeri, lenirsangji ozüng aser temzüng nung ajemdaker shimtetba asü, ta masüngdanger, saka shima aliba lenirsang jagi nüburtem tim lenmang nung anir asü manir, aser lenirsangji nüburtem atema junger asü majung ta asüngdanger,” ta metetdaktsü.
“Naga nungeri ‘ochi dang ochi’ ta ashitsü mapang tongogo,” ta Lotha Hoho-isa kasa sangdong ajanga metetdaktsü.