CM Zeliang-i state tensa indang Union Minister nem metetdaktsü

Kohima, February 09 (TYO): Tanü nikongdang New Delhi nung Nagaland Chief Minister TR Zeliang-i Union Home Minister, Rajnath Singh dang, tang state nung Nagaland Tribes Action Committee aser sorkar na tsüngda tensa indang aser mokdangba ajanga state kongshiba indang metetdaktsüogo, ta tanü Chief Minister’s Office, Nagaland, Media Cell-i sangdong ka ajanga metetdaktsü.
Chief Minister-isa Union Minister dang, tetsürtem nem menden shilem 33 shiteta yutsür ULBs election agitsü atema tribal tentet aikati melungba sülen sorkari temzüng nung aliba ama ULBs election agitsü nükjidong nung tetsür nem menden 33 yuja ULBs election agitsü atema maparen inyakba indang, aser election agitsü atema sangdongba sülenbo tentet aikati iba anema nokdakba indang osang tejangja metetdaktsü. CM-isa, tentettemi ibaji pusema osangkakettem nung sangdongba nungi agitetba ‘clippings’ Union Minister nem agutsüogo, ta sangdong nung shia alir.
Chief Minister-i longkak aiter teloktemi akhangbatem indang aser parnoki akhangbatem ataloktsütsü atema sorkari inyakba osang tejangja metetdaktsü, ta sangdong nung shia lir.
Union Minister Rajnath Lucknow nungi New Delhi-i aruba sülen tayimtsü anendak Chief Minister ajurua liasü, iba sülen Lucknow-i meyipa ao.
Asüng Chief Minister Kohima tonga arutsü aser lokti tentet aser tribal tentet balala nungi züngsemtem ajurutsü sentong lir, ta CMO, Media cell sangdong ajangasa metetdaktsü.