India-i ‘secret nuclear city’ yanglua lir:Pakistan

Islamabad, February 09 (Agencies) : India-i asen tesem nung parnok tashi sayutsü asoshi nuclear oset aika bendena lir, ta Brihostibarnü Pakistan Foreign office ajanga metetdaktsü.
Foreign Office atema otongdar Nafees Zakaria-i, India-i “secret nuclear city” yanglua lir aser parnoki inter-continental missile tem tendanger, ta ashiba osangkakettem ajanga metetdaktsü.
Zakaria-i ashiba agi, iba ama mera yagi asen tesem nung tashi liromemedemi kümdaktsür.
“Pakistan-ibo India dena tesem nung aliba kidanger linüktem ajak den yimjung nung alitsü meranger,” ta pai ashi.
Zakaria-i, “India nungeri Pakistan züngtoktsü merangba makokba ajanga parnok inyakyim tali jungkai adoker. Pakistan-i yimjung asoshi agiba meratem nung India sorkaria shilem agitsüla,” ta shisem.
2016 küm Institute of Strategic Studies Islamabad-i ngutetba osang ka ajanga ashiba agi, India-i nuclear bomb 356 nungi 492 tashi yangluba nung tamakok aluogo.
“India nungeri parnok indang reactor tem plutonium yanglutsü asoshi miima amshitsü akok aser tang aliba osettemji khen lirbo military sentongtem nung amshitsü südi ta tsübua bilemer,” ta Foreign Office nung Disarmament Director General Kamran Akhtar-i ashi.
India-i parnok nuclear sentongtem International Atomic Energy Commission-i tuyuba kübok inyaktsüla, ta Pakistan-i tan hopta tetenzüklena shiogo.