Tetsürtem quota bill benoktsü: Venkaiah

Amaravati (Andhra Pradesh), February 10 (Agencies): Kodang Rajya Sabha nung Modi sorkari majority ngudir Parliament aser state assembly tem nung tetsürtem nem menden lemzüktsütsü atema bill ka benoktsü, ta Hokolbarnü Union Minister, M Venkaiah Naidu-i metetdaktsü.
Amaravati, Andhra Pradesh nung National Women`s Parliament (NWP) sentong nung jembidang pai iba o metetdaktsü.
“Parliament aser assembly tem nung tetsürtem nem menden lemzüktsütsü atema Parliament nung bill ka agizüktsü anogoji menoa mali. Ibaji Ato kilonseri bilema lir,” ta pai tetsürtem dang sangoktsü.
“Onoki kodang Rajya Sabha nung majority ngudir, onoki iba bill ji agizüktsü,” ta Information & Broadcasting and Urban Development Union Minister, Naidu-i ashi.
Iba o ya, Lok Sabha aser state assembly tem nung tetsürtem nem menden shilem 33 wazüka yutsütsü atema temzüng yanglushitsü asoshi bill ka benoktsü dak sentakba nung jembiba o lir.
2010 küm iba bill ji Rajya Sabha nungbo agizüka liasü.
Pai ashiba agi, tetsürtem indang self-help groups (SHG) ji tetsürtem nem tashi agütsütsü atema hadir tajung ka lir.
Paisa Andhra Pradesh nung self-help groups timtiba aliba atema tenüngsang agütsü.
Minister-i, NDA sorkari sorkar scheme ajak nung tetsürtem atema tongtibangsüa inyaktsür, ta ashi.
Kasa sentong nung AP Chief Minister, N. Chandrababu Naidu-ia, legislative assembly nung tetsürtem atema menden shilem 33 mezüng akhangbaji par party, Telugu Desam Party lir, ta metetdaktsü.
Anogo asemnü mongdang nung India aser bendanglen nungi tetsür 10,000 dak tema tendar.
Iba mongdang tetenzük sentong nung Tibet lenir, Dalai Lama, Bangladesh Parliament Speaker, Shirin Sharmin Chaudhury, Puducherry Lt. Governor, Kiran Bedi aser actress Manisha Koirala nungera liasü.