DDCF-i yimjung atema ayongzüker

Dimapur, February 10 (TYO): Hokolbarnü Dimapur District Citizens Forum (DDCF) rongdak senden ka mena tang Nagaland nung ULBs election dak sentakba ajanga tensa raksaba onük nung o lemtepogo, aser yimjung nung tensa süngjemtsü nüngdakba indang jembiogo, ta DDCF Tir, N Joseph Lemtur aser tongti tezülur, Ahidur Rehman nati sangdong ka ajanga metetdaktsü.
DDCF-isa January 31, 2017 aonung Dimapur nung lanur ana taküm samaba tatalokba aitsüogo.
DDCF tenüng nung lenir anati asür Avizo Metha aser asür Bendangnungsang Ao na kinüngertem den mangyim tejashi lemsateper aser asürtem nem tatemmaka anisüngzük agujang ta sarasademtsür, ta metetdaktsü.
DDCF-isa, tim ketdangsertemi onüktem latettsü atema kanga shisadanga inyak asübo, nisung samatsüsa tensa majurula, ta sangdong nung shia lir.
“DDCF-i taruba HSLC aser HSSLC exams atema aser tang tensa ajanga kaketshirtem kongshiba indang tebilemtsü katsür. Talisa mapang talangka SMS aser mobile data nokdangba ajanga kaketshirtem, shishilembartem, banking, mapa bushirtem atema interview ama aika nung kongshiogo, anungji sorkari tekaraba nung iba tenokdangba agientsüla,” ta kasa sangdong nungsa shia lir.
“January 30, 2017 nü Nagaland Baptist Church Council (NBCC)-i state sorkar aser Joint Coordination Committee (JCC) tsüngda ia yimjung mapa inyakba atema pelar,” ta DDCF sangdong nungsa shia lir.