2018-19 nungi tenzüka Engineering züngnür atema tatidang khen dang alitsü

New Delhi, February 10 (Agencies): 2018-19 küm academic session nungi tenzüka engineering college nung azüngtsü asoshi NEET ama tatidang ya khen tang agitsü aser iba tatidang nung amshitsü asoshi temzüng aser ozüng tetemsü renemtsü asoshi Human Resources Development (HRD) ministry ajanga All India Council for Technical Education (AICTE) dang asüngdang.
India nung engineering college tem nung technical education dak sendakba maparen ajunga AICTE ajanga repranger aser undergraduate course agitsü asoshi entrance test ken dang agitsü asoshi AICTE ajanga tang tesüsa amenba senden nung jembi.
Iba temelenshi tasenba kübok yagi linük nung IIT ajanga technical tatidang balala agiba densema aittsü südi, ta angazükogo.
Tatidang agiba nung ochishia agitsü aser kaketshir nem tatidang aika agiba ajanga khuret aika agütsüba nungi kümzüktsü asoshi HRD ministry ajanga iba telemtetba ya agi, ta osang ajanga ashi.
State aser Deemed University balala nungi iba sentong tasenba asoshi shisa tajung agütsütsü asoshi ministry ajanga ajungshir.
‘Single entrance test’ ya küm shia mapang apir aiben agitsü aser iba tatidang nung oshi balala nung agitsü sentong yanglutsü, ta osang metetdaktsü.
Tang linük nung Medical college tem nung azüngtsü asoshi NEET ajanga tatidang kasa dang agir saka engineering college tem nung azüngtsü asoshi tatidang balala agir.