NTAC Kohima & JCC nati nübortem renema alitsü mepir; Angh dang aibelenertem merenshitsü ayongzüker

Kohima, February 10 (TYO): Taonung ayaterm tashi nung Chief Minister, T R Zeliang-i menden metoktsüra state nung aliba nübortemi kechi tensa ajurudir ajuruaka renema alitsü mepishir ta Nagaland Tribes Action Committee (NTAC) Kohima aser Joint Coordination Committee (JCC) nati ayongzükogo.
State sorkari tetsür nem shilem 33 lemzükja Urban Local Body indang elections agitsü lemtetba anema public-i nokdakba nung NTAC Kohima aser JCC nati ketdangsüa maparen inyaker.
January 31, 2017 nungi iba onük asoshi mangatettep adoka state kübok tesem balala nung lendongtem atalokdang nisung asem taküm laluogo, aika yiru aser sorkar office den nija kiojen 24 shi ka raksaogo. Maneni lungkak aitertemi sorkar indnag gari kar raksatsüogo.
Tanü nikongtsütsü NTAC, Kohima aser JCC teloktemi Raj Bhavan nung State Angh P B Acharya den ajurutepba sülen, TR Zeliang-i menden toktsütsü atema mapang züngzüktsüba tembangtsü ghonda ishika lia parnoki nübortem nem temepishiba agütsüogo.
Tesüiba anogo 8 tashi Nagaland nung law & order tensa aser sorkar ketdangsübaren meinyaktetba indang osang committee temi Angh den lemsatep, ta NTAC Secretary C T Jamir-i ashi.
“State nung Constitutional Machinery anendaka aliba nai meteta lir. Tesüiba anogo 8 tashi, sorkar office tem melapoker aser ibaji ajanga sorkar ketdangsübaren mali ta sayur aser nübortemi timtem jenti ajurur” ta tanü NTAC, Kohima aser JCC nati Angh nem tezüluba ka agütsüba nung shia lir.
Iba ama tensa tamajung ajuruaka, T R Zeliang-i Chief Minister menden metoktsütsü atema tekong meranger aser nübortemi ola adokba sülen anidaktsü tashi mangar, ta parnokisa tezüluba nung metetdaktsü.
February 3 nü Angh-i parnok dang Linük Temzüng nung lateta aliba ama mapa inyaktsü aser aibelenertem merenshitsü ta nangzüka lir. TR Zeliang-i pai aibelenba nangzükogo aser sorkar tenüng nung tatok meshiogo saka tanü tashi Angh-i nangzükba ama mapa meinyaki lir, ta parnokia ashi.
Chief Minister indang mendenji kanga dang akhümket aser tetushi menden ka lir aser iba nung aibelenertem masü saka tashishitsü malirtem amentsüla. Anungji, state nung tensa tajungba kümdaktsütsü atema Angh-i tiyongtsüi aita nüngdakba mapa inyaktsü nüngdaker, ta NTAC aser JCC natisa ashi.