Tenük meremba taa

Asenoki kodang tangar temoatsü aser takok nung tenük meremdir, iba anogo nung jagi asenoki asenoksasa asenok taküm raksatsü tenzüker ta angatettsüla.  Asenoki tangar dak tenükmeremtsü tenzükdang temeneni asen taküm nung mapa tuluka inyak tenzükba  otsü ka 1 Samuel nung Saul chuba dak atalokba  angutsü. Ibai Israel nunger asoshi Filistia nunger Goliat tsüngdang lapi akümba mapang ka liasü. Goliat-i Israel nunger dang pa den raratsüsa Israel nungertem rongnung  tebur ka danga lira yokang ta anogo 40 nü amokmerena  nokdak. Iba amokmerenba olaji angashir Saul chuba aser Israel nungertem kanga aoksa aser tsübua adok. Tetezü, Goliat tsüngdang Saul chubai anir Israel nunger ajak tasü peleta adok. Iba ama tatenden tetsübu mapang ka  nung  David-i Goliat tepset. Atangji, David-i Goliat tepsetbaji David asoshi masü saka Saul chuba atema Filistia nunger madak takok anguba anogo ka liasü. Aji oda, Israel nunger tetsürtemi David nem tenüngsang ken mejema metenloktsü dang Saul-iang tama pa nem  tenüngsang agütsü langa liasü. Ajisüaka, Saul atema tia kanga majung, pai David nem tenüngsang agütsütsü melen tenükmeremtsü tenzük.  Aji oda, kodang Israel-tsürtemi Saul-i meyirijang tepset saka David-i meyirijang ter tepset ta kongki tema tsüngsanga Saul chuba tsüngdangi David nem konang tetushi agüja aru, idangji Saul kanga jashi aser iba anogo nung jagi pai David dak tenükmeremtsü tenzük. Alima tsütsü bilemdangbo, temeimtsüka Goliath tsüngdang tsübuseta aliba tia nungi Israel nunger kümzükba atema menden tajung ka agütsütsü melen, Sauli Davidji jara nung neploka tsüngseta südaktsütsü bilem. Ajisüaka,  Saul-i David nüngtugu akümba anema tenük merembaji David atema masü Saul atema dang takoksa aser timtem ajurutsü tenzükba anogo liasü. Idangjisa, Saul dak temenen ai aser Saul-i David tsübu, kechiaser pa den Kibuba dena liasü. Iba tashijibo Davidji sanüker ka dang aser Saul-bo chuba saka chuba kati sannüker tsübua shisabolutsü tenzükba timtem ajakji tenükmeremba nungi adokba timtem aser taa liasü. Tsüngremi Saul chuba kümdaktsü aser lenmang aika nung moatsü, saka Saul-i Tsüngremi pa nem moatsüba temoatsütem züngdanga tenüngsang agütsütsü melen David nem moatsüba takok aser tenüngsang anema dang tenük merema bilem. Aji oda, Khristan taküm ka nung tangar dak tenük meremtsübaji nüngdak madoker. Asenok nem moatsüba temoatsütema asenoki jungjunga asen taküm den medemdangra, itemji asenok dak malangba temoatsütem lir ta asenoki reprangtettsü. Ajangla, asenok nem moatsüba temoatsü asoshi Tsüngrem nem tenüngsang agüja tangar den jungteptsü melen kodaser tangar takok aser tangar akaba anema tenük merema dang alitsü ? Tenük meremba mulungjang nung tepela mamonger aser tepela mamongdak tesemji temenen amongdak tesem tajungtiba akümer. Yamaji Saul chuba taküm nung atalok. Aji oda, tanü asenokia asen mulungjang ken meyipa reprangdangdi. Saul chuba amaji, asen mulungjangia tangar akaba aser tangar takok anema tenük meremer asü ? Tangar taküm aser kibong moatsüba angudang asenok mepela akümer asü ? Yamaji asen taküm nung ataloka lira, kanga kümdangdi, kechiyong iba jagi Saul chuba taküm aser kibong ama asen taküm aser kibonga raksatsütsü. Tenük meremba tenüki Tsüngremi asen nem moatsüba temoatsütem mengudaktsür saka tangar nem dang moatsür ama ngudaktsür. Idangji nisung mulungjangi temenen tanüla aiter aser iba temenen tanüla jagi tangar taküm aser kibong raksatsütsü ajungshir. Ajisüaka, tekümdangtsü kaji, tangar raksatsütsü bilemdang asen taküm aser kibong tama raksar alitsü. Laishibai ashir, kechisarina ajak nung tenüngsang agüjang. Tetezü, tangar nem agütsüba takok aser temoatsütem asoshia asenoki Tsüngrem nem tenüngsang agütsütsüla, kechiyong ajak atema kar nem moatsür. Aji oda, Goliat ket nungi pa kümzüktsü asoshi David moatsü ta Saul-i angatet asübo, pa aser par kibong ajunga atema ano koda temoatsüba süla !