Nüburtemi Congress, SP aser BJP ji junga meteta lir: Mayawati

Lucknow, February 11 (Agencies): Uttar Pradesh elections nung party-i takok tulu angutsü ta shia tanü Honibarnü Bahujan Samaj Party (BSP) tongti, Mayawati-i, nüburtemi Congress, Samajwadi Party aser Bharatiya Janata Party (BJP) party temji koma’ar tangbo junga meteta lir, ta aitsü.
Osangbener dang Mayawati-i, “Uttar Pradesh nung BSP-i dang sorkar tajung ka agütsütettsü. Congress-SP teloktep aser BJP-i nüburtem anisatsü meranger, ajisüaka tangbo nüburtemi parnokji jungjunga meteta lir,” ta ashi.
BJP aija, Mayawati-i, Centre nung aliba sorkari 2014 küm Lok Sabha elections nung nangzükbatem mataloktsüteter, ta aitsü.
“Centre nung BJP sorkar tashi nung küm 2 ser tesadang shi lir, ajisüaka parnoki nangzüka alibatem nungi parnoki shilem pezüsü nungi shilem kata meinyaktet,” ta Mayawati-i ashi.
“State nung BSP mopungsem tulu lir aser, tanü election mezüngbuba shilem nung onoki junga ngutetogo ta ni osang nguogo,” ta laisa shisem.
Tanü district 15 kübok assembly constituency 73 nung election agiogo.
Linük nung nütsüng timtiba aliba state nung assembly election mezüngbuba shilem nung menden 73 atema candidate 839-i toktepogo. UP nung maneni February 15, 19, 23, 27, March 4 aser 8 anogotem nung election agitsü, aser March 11 nü vote azüngtsü.