China sepai ka küm 50 sülen India nungi par lima atong

China nunger sepai Wang’er kibong noksa ka yangi angur. Noksa achijilen mena alisang Wang den par jabaso Vishnu Wang, 35, jabaso kinungtsü Neha aser semshir (jala), Khanak Wang nunger Beijing tongogo.

Beijing, February 11 (Agencies) : 1962 küm Sino-India war temli mapang ka nung memeteti India arrtsüleni aiter küm 50 sülen Shaanxi province, China nung aliba par kidangi meyipa aoerba tang Beijing tonga lir.
Arishi küm 77 tain, Wang Qi aser par kibong Beijing tonger mapang tatsüka ogo aser parnokji par kinungertem den China Foreign Affairs Ministry aser Indian embassy-i agizük.
Wang den par jabaso arishi küm 35 tain, Vishnu Wang, jabaso kinungtsü Neha aser semchir (jaja), Khanak Wang nunger ya tanü Delhi-Beijing tayimtsü nung par linük oa atong. Ajisüaka pa kinungtsü Shushila-bo parnok den moui India nung lir.
Wang India arrtsü alema ia India nung alitsü tenzüker küm 50buba nung tan mezüngsüa par kinungertem den ajurutepa azütepdang pa temulung kanga raksa, ta ketdangser kati osangbenertemi dang ashi.
“Onok Embassy nungi tanabuba secretary tem, Thelma John David aser Siddharth Malik na dena tena agizük. Wang Qi aser par kibong den onok indang mission official-a ana dener aru,” ta External Affairs Ministry nung otongdar Vikas Swarup-i ashi.
India nungi ketdangser ana den Wang’er kibong khen lir Shaanxi province yimtiba Xian-i tayimtsü nung aotsü aser yang nung jagi par yim Xue Zhai Nan Cun-i aotsü.
Wang ya China army nung 1960 küm nungi aden aser 1962 küm rara temli mapang ka nung memeteti India arrtsü alema nemzüyonga aitdang apu.
Indian Red Cross teloki 1963 küm pa India army ket nung agütsü aser iba sülen Assam, Ajmer aser Delhi tepuokdak tesemtem nungsa ayu. Punjab aser High Court nati 1969 küm pa tepuokdak nungi chioktsü tetuyuba agütsü.
Iba sülen pa Madhya Pradesh nung Balaghat district kübok Tirodi jila nung ali aser yaji India tsür ka den kibong aküm.
Par kibong rangben China limai aotsü asoshi India aser China na tsüngda o agizüktepa jembi aser parnok kodang arunüdir arutsü temelaba agütsü.
Beijing-i apusotsü anasa par jabaso, Vishnu-i, “Kübo China army nung 1960 küm nungi aden aser ammang nung len manguba ajanga India arrtsü alema aita January 01, 1963 nü Assam tonger lia Indian Red Cross telok kati pa Indian Army nem agütsü, ta osangbenertem dang ashi.