Hindustan Motors-i Peugeot dang Ambassador ayok

Kolkota, February 11(Agencies): Indian nung yangluba nüngtugu gari Ambassador koba ajanga küm 10 tejakdang tashi Prime Minister aser neburtem anir senzü, iba gari France nung gari yanglur ‘Peugeot’ dang yokogo.
C K Birla Group meyong Hindustan Motors-i Hokolbarnü crore 80 agi iba gari brand yokogo. Ambassador gari küm asem tejakdang yanglu anener liasü.
“Onoki Ambassador brand aser trademark dena Peugeot SA Group dang ayoktsü lemtetogo. Iba shishilembaba nung ajangzükba sen tangar dang apua aliba aser mapa inyakertem nem sen magütsüi alibatem aotsü,” ta CK Birla Group o tongdari ashi.
1960s aser 70s nung soa ainertem atema Ambassador ya gari dang ka masü saka India nunger jilatem atema shilem ka liasü. Gari peria maliba tensa ka nung India nung shirnoki gari alitsü asoshi koka liasü, parnoki Ambassador gari alitsü asoshi shima liasü. Aika asoshi iba ya kanga temenungratsüka lir.
Peugeot teloki Ambassador brand ya India nung parnok garitem asoshi amshitsü mamshitsüar mejangja. Iba dak sendakba nung tasüngdangba agütsüba tang tashi melangzüi lir.
Ambassador brand ya küm 70 tejakdang Hindustan Motors-i saya. Maruti 800 madok tsüngda iba gari 1980s tashi India nung kanga nüngtugu süa amshia aru. 1980s tiyongtsü ka tashi ambassador gari 24,000 adoka aliba 2013-14 tashi nungbo 2,500 tashi ajema alu.
May 24, 2014 nung koda masüba timtem kar ajuruba ajanga Hindustan Motors meyong Uttarpara factory nung gari yanglu anen. Uttarpara plant ya 1942 küm tenzük, aser Asia nung tejentiba rongnung Japan nunger company Toyota sülenbo iba ya lir.
Peugeot company 1990s tiyongtsülen India nung küm asemshi gari yanglua ayok. Iba mapang nung Peugeot 309 PAL-i gari assemble süa ayok. Yaküm Peugeot Citroen-i 2018 tashi nungbo India-i meyipa arua mapa inyaktsü sangdong.
Taküm küm tetenzüklen company-i CK Birla Group den Chennai plant atema JV ka kümtet. Iba tangatettep ya Chennai nung aliba Hindustan Motors plant par company gari yangluba nung amshitsü asoshi yanglua liasü. Chennai plant nung tang Mitsubishi garitem yangludar, aser küm ka nung iba plant-i unit 12,000 yangluteter.