Anogo ishika tsüngda nung ‘Green Comet’ ka alima ajanga süitsü

February 11, 2017 (Agencies): Comet reprangnertem atema anogo ishika tsüngda nung binoculars mesüra telescope amshia comet 45P/Honda-Mrkos-Pajdusakova reprangtsü akoktsü, ta Honibarnü NASA-i metetdaktsü.
“Taküm küm tsüngda aser sangküm küm tatemlen comet asem alima adena süitsüba aliba rongnung iba ya mezüngbuba asütsü. Iba comet tereprangnertemi angutsüsa aser scientists temi ali nungi instrument tem amshia iba ya bushidangtettsü koka alima anasa süitsü,” ta US space agency-i metetdaktsü.
45P ya 1948 küm ngutet. Iba ya short-period comet ka lir, aser anü alongtsü asoshi küm 5-1/4 agir.
Iba comet alima nungi kilometer million 12.4 shi pilar süitsü, aser iba hopta süitsü aliba ya alima anasatiba süiba asütsü. Iba comet maneni 2032 küm alima nungi kilometre million 48 shi pilar süitsü.
Scientists temi maongka agia 45P ali nungi NASA indang Infrared Telescope Facility amala amshia, iba comet nucleus nungi adokba tangolatem, auyi aser rülongtem bushidangtsü.
Comet nung aliba tzü, methane aser tanga compound tem shisadangba ajanga comet pa kümtetba mapang metettsü. Iba ya bushisüngdangba ajanga maneni astronomers temi comet melenshiba ngutettsü.
NASA-i ashiba agi, comet 3 alima süitsüba rongnung tanabuba comet 41P/Tuttle-Giacobini-Kresak April 1 nü alima anasatiba süitsü, aser tasembuba comet 46P/Wirtanen December 16, 2018 nung süitsü.