Congress pur UP election atema nübuyimba sentong nung AIUDF aden

Guwahati, February 12 (Agencies): Assam nungi AIUDF nung lenir aikati UP election nung Congress aser SP na teloktep nüboyimba nung yaridar.
Item lenirtem rongnung Lok Sabha züngsem asem dak alaka party MLA 13 prongla dena lir. Iba telok party tir Badaruddin Ajmal lenisüba kübok, Muslim nunger longsoa aliba tesemtem nung nüboyimba sentong agidar.
UP nung lokti senden balala nung, party lenirtemi Congress yimsüsüba tembangba sülen Assam nung tamangba yimsü nung nübo tajemba aliba telok kangshiba indang jembidar. Parnoki Muslim nungertem dang SP-Congress telok nem parnok vote agüja iba election kokdaktsütsü asoshi ajungshi.
“BJP-i aniba sorkar Assam nung amenokba sülen nübo ajema aliba telok timtemba osang angashia onok kanga aoksar. BJP mesüra NDA asünunga onok asoshi medemer masü,” ta sentong nung adener Mustaqu Islam-i ashi.
Noida, Surajnagar tesem nungi Rumki Begum-i Congress dang nungi BJP tajungba ta ashi. “Shirnoki tang tashi nung nübo agi ajema aliba teloktem ashiokja aru? Iba telangzübaji Congress lir. Shirnoki tang tashi nung nübo agi ajema aliba teloktem asoshi mapa aika inyaka aru? Aji NDA lir, anungji onoki kechiba Congress mesüra SP nem vote agutsütsü?” ta lai ashi.
“Muslim nunger shilem 70-i danga SP- Congress nem vote agutsünungbo ibaji ajanga tuluka yaritsü. Mayawati-i BJP den longjemtsü akok, ta voters tem nem angatetdaktsütsüla. Onoki iba indang UP voter tem dang shidar,” ta Ajmal-i ashi.