Ali nungi adokba rongsen onük nung media senden ka agi

Guwahati, February 12 (Agencies): ‘Governance of natural resources & conflict in North East region’ onük nung ajemdaker osangbenertem senden ka, Canada Fund for Local Initiatives teyari ajanga Actionaid Association Guwahati Regional office-i Guwahati nung aliba Hotel Brahmaputra nung yashi ayongzüka agiogo.
Iba senden nung, Bard College, New York nung Professor of Political Science, Sanjib Baruah aser Business Standard nung Senior Associate Editor, Nitin Sethi na tongti o jembir liasü.
“North East state tem nung ‘hydro electric power project’ aser ali nungi adokba rongsentem atuba ajanga tzü mopung raksatsür,” ta Sanjib Baruah-i iba senden nung jembidang ashi.
“Development project tem tenzükba mapang kanga nang-nanga nüburtem ajak mesüzüker saka sen aika indokaka tamakok alur. North East nung tzü-tepdang (dam) aika yangluba nung tamakok aluogo aser ibaji ajanga nüburtem dang timtemer,” ta pai ashi.
“Tzü nungi adokba electricity tashi yanglutsü asoshi project aika tenzüker tamakok aluogo, aser ibaji ajanga tzü mopung raksatsür. Ali nungi adokba rongsen ya shishilembartemi timba bushir. Iba amala project metenzükdang jungjunga shisadangtsüla,” ta Nitin Sethi-ia ashi.
Ali nungi adokba rongsen bushiba, ‘hydro electricity power project’ atema dam yangluba, arem shiruru tepsetba aser development tenüng nung arem aser tzü mopung raksatsüba ajanga nüburtem nem tebilemtsü balala agütsüba onüktem, North East State balala nungi Journalist temi iba senden nung lemsatep.