NSF aser NPF nati kaketshirtem atema bilemtsür

Dimapur, February 12 (TYO): February 14, 2017 nung kaketshirtem tatidang agütsütsü lir anungji Naga nunger ajaki shisaliok rejutem tetsükdaktsü kecha majurui lapoktsü atema mapa inyaktsü mepishir, ta Naga Students’ Federation (NSF)-i sangdong ka nung metetdaktsüogo.
Tanü tensa ajanga school aser college tem melapoktetba ajanga lanuputu tarutsü asoshi takoksa ulura bener arutsür, ta NSF-i ashi.
NSF-i kaketshirtem dang mepetmesü nung temulung magütsütsü saka tatidang junga agütsütsü atema meranga bushitsü ayongzüker aser tatidang agütsütsü aliba Class X, XI aser XII kaketshirtem ajak moatsür, ta Secretary Education, Imtiyapang-i sangdong nung shia lir.
Media & Press Bureau NPF Central Office-ia sangdong ka nung, February 14, 2017 nungi HSLC aser HSSLC tatidang tenzüktsü liaka, lungkak aitertemi state tesem balala nung mokdangba sentong ayongzükba atema süoki ia bilemba metetdaktsüogo
Nisung kar yimtenren tsütsü tajangzük angutsü mechi nung lungkak aitertemi tai maketba civilian tem timtemdaktsür. Lungkak aitba teloktemi akhangba ama Sorkari elections magi kümdaktsüba ajanga ULB elections aser tetsür nem shilem 33 lemzüktsübaji indang onüktem asoshi telangzüba agütsüogo, saka lennir kari parnok ajangzüktsü atema bilema inyakba angudang kanga sasar, ta NPF party sangdong nung shia lir.
Takoksa majurutsü atema party sorkari aremzüka dang arur, saka lungkak aitertemi President’s Rule benoktsü nükjidong nung sorkar ketdangsübaren nokdanger. Iba ama inyakyim ya shiametetertem aliba aser democratic loktiliba ka nung inyaktsü madoker, kechiyong iba ama loktiliba ka nung tashiyim agi masü saka olemtep ajanga angatetteper, ta NPF sangdong nung shia lir.
Nisung ajaki tarutsü putu atema bilema inyaktsüla aser tang kaketshirtem tatidang agütsütsü aliba mapang nung timtem magütsütsüla. Kaketshirtem shisaluyimba nung timtem agütsürtemji, putiotsü nung züluoktsü aser kaketshir meyirjang aika tarutsü raksatsürtemji tarutsü pututem nunga tenüng tetshitsü, ta Media & Press Bureau NPF Central Office-isa metetdaktsü.