Naga nunger Khristan lennirtemi mepishir

Dimapur, February 12 (TYO) : NBCC-i State sorkar aser lungkak aitertem tsüngda tiyongtsü ia shilem agiba pusema nungiter ta Dimapur aser Kohima nungi Naga Khristan lennirtemi sangdong ka nung metetdaktsü.
“Iba ama tensa ka nung Tsüngrem dang lenmang sayuang ta sarasademba dak alaka tanga lenmang kecha mali. Anungji, Nagaland nung Khristan tem tenüng nung onoki Sorkar aser NTAC/JCC dang Tsüngremi nenok nem mulungsentsü agüja aliba anema mapa meinyaktsü mepishir,” ta lennir 20-i sangdong nung ashi.
“Ozü lennirtem nem tangatetba agüjang aser parnok mulungsentsü nem len anidakja kechi shitak aji inyakdakjang ta tanü nübortemi Tsüngrem dang nenok atema sarasademtsür. Iba nung ajemdaker onoki telok anaprong dang tekong merangtepba anentsü aser atsüanem katepa olemtep alitsü ayongzüker,” ta Rev. Moses Murry, General Superintendant, AGEI, Rev. N. Pahino, President NCRC, H. Moba Konyak, KBPF, Sankara Narayan, KBPF, Rev. Amos Humtsoe, Baptist Church Dimapur, Rev. Dr. Tseibu Rutsa, Baptist Ministry Church, Rev. Vemuse Suohur, Naga Bazar Baptist Church, A. Taku Longkumer, Chairman, Nagaland Peace Co-ordination Forum, Rev. Dr. Rachülie Vihienuo, Union Baptist Church, Kohima, Rev. Fr. Neisalhou Carolus, Catholic Church Nagaland., Rev. Fr. Thomas Toretkir, Catholic Church, Kohima, Rev. Phomlee Van, KBPF, Z. David Koza, NCRC, Deacon Obed, Catholic Church, Botoholi, NBCC, Kedo Peseyie, City Church Kohima (KBPF), Fr. C.P. Anto, Peace Channel, Catholic Church., Rev. L, Kari Longchar, Baptist Clergy, Arithung Kikon (KBPF) aser Niketu Iralu, Baptist Church, Sechü Zubza nungertemi külem sangdong nung shia lir.
“Chief Minister, Cabinet aser Nagaland State Assembly nung züngsemtemi lungkak aitertem den olemtep alitsü ayongzükba pelaa agizüker. Olemtep metenzükdang tamasa public-i sorkar dak temulung lemdaktsütsü atema mapa kar inyaktsüla. Anungji, temeim Chief Minister, na sorkar nung tekolak ka asünung, onoki nü dang telemtetba tajung ka agitsü aser nü mulungsentsü agi kechi shitak ta ashir, yamaji inyaktsü mepishir. Iba jagi nü lenisüba tajung sayutsü aser olemtep tenzüktsü atema lenmang lapokba den ozüng alema inyakba mapatem paidoktsü,” ta parnokisa ashi.
Naga nungeri magizükba onüktem benokba aser mapa timi meinyakba anema nokdakba telok balala nung lennirtem danga, ozüng alema mapa meinyaktsü onoki mepishia metetdaktsür. Ozüng alema mapa inyakba ajanga khuret ang talila bener arutsütsü. Iba onük atema taküm bendanga agütsür nem tetushi agüja aser Naga nunger tesentaktep nung teraksa talila madokdaktsütsü atema onoki nenok dang yimjung nung olemtep agia aotsü ayongzüker, ta parnokisa shisem.“Chief Minister, Cabinet aser Nagaland State Assembly nung züngsemtemi lungkak aitertem den olemtep alitsü ayongzükba pelaa agizüker. Olemtep metenzükdang tamasa public-i sorkar dak temulung lemdaktsütsü atema mapa kar inyaktsüla. Anungji, temeim Chief Minister, na sorkar nung tekolak ka asünung, onoki nü dang telemtetba tajung ka agitsü aser nü mulungsentsü agi kechi shitak ta ashir, yamaji inyaktsü mepishir. Iba jagi nü lenisüba tajung sayutsü aser olemtep tenzüktsü atema lenmang lapokba den ozüng alema inyakba mapatem paidoktsü,” ta parnokisa ashi.
Naga nungeri magizükba onüktem benokba aser mapa timi meinyakba anema nokdakba telok balala nung lennirtem danga, ozüng alema mapa meinyaktsü onoki mepishia metetdaktsür. Ozüng alema mapa inyakba ajanga khuret ang talila bener arutsütsü. Iba onük atema taküm bendanga agütsür nem tetushi agüja aser Naga nunger tesentaktep nung teraksa talila madokdaktsütsü atema onoki nenok dang yimjung nung olemtep agia aotsü ayongzüker, ta parnokisa shisem.
Naga nunger sobaliba aser inyakyimtemji temeten, kasa tangatetba, akhümtsübu aser nüjiso nung amendaker lir. Anungji, asenoki iba khuret ya Naga nunger sobaliba nung tetsürtem akhümtsübuba aser temeten agütsüba wazüka ayutsü atema maongka ka ama agidi. Iba mapang asenoki asen inyakyimtem meyipa reprangshidi aser asenok tsüngda democratic inyakyim nung olemtep lidi aser Naga nunger tetsür, tebur aser lanurtemi asen külem tarutsü atema shilem agitettsüsa tashi agütsüdi ta ayongzüker,
Nagaland nung aliba Khristan tamanger ajak dang Naga nunger tsüngda yimjung arutsü aser olemtep tajung tenzüktsü atema sarasademtsü ayongzüker, ta parnokisa shisem.