Tanü nungi tenzüker Nagaland ajunga mokdanger

Kohima, February 12 (TYO) : Chief Minister T R Zeliang-i menden metoktsütsü tekong merangba anema Joint Coordination Committee (JCC) aser Nagaland Tribes Action Committee (NTAC) Kohima nati Hombarnü ghonda 12 mokdangtsü ayongzükogo.
“TR Zeliang dang Chief Minister menden nungi alung ta takhangba agütsüba magizükba aser pai tekong meranga nokdakba ajanga JCC aser NTAC Kohima nati asüng (Hombar) anepdang 6:00 nungi nikongdang 6:00 ako tashi mokdangtsü ayongzüker” ta media cell sangdong ka nung metetdaktsü.
Mokdangba sentong nung tashi mamshitsü aser timi dang agitsü ta JCC aser NTAC nati ashi. Parnokisa public dang kodamasüba timtem aremtsü aser maneni yariteptsü mepishia metetdaktsü.
Mokdangba kübok Press/Media & newspaper hawkers, Para military, Administration on duty, Medical tem maitdaktsür, saka Nagaland Board of School Education aser State Council for Education Research and Training dena shisaliok rejutem ajak nokdanger ta parnokisa metetdaktsüogo.
Taoba mapang nungbo shisaliok rejutem tenokdangba kübok maitdaktsüi liasü.
Deobarnü NTAC Kohima-i Kohima nung aliba kin teloktem den kanga dang tongtipang senden ka ayonga amen aser iba mapang parnoki Kohima kübok tesem balala nung nübotem lemzüktsütsü atema sentong yanglu.
Tanü senden nung adenertemi Kohima nung MLA tem amungba indang onük benoka jembidang, Nagaland Chief Minister, TR Zeliang pusema nungitdaktsütsü atema parnok ajak pudener ayur ama ajiteter, ta NTAC Kohima Media Cell sangdong ka nung metetdaktsü.
“Tang ama sorkar ketdangsübaren mapa meinyaktettsüsa tensa ajurudang, MLA tem Kohima nung amungtsü melena pei pei constituency tem nungang oa amung tajungba asütsü. Naga nunger ajaki ola adokba mapang ka nung MLA temi nübortem ola mangashii parnok ajak külemi telongjunga mungtepba nung lendong keta lir ta parnoki angatettsüla. Parnokji nübor tenzüktsü atema shimba lennirtem lir, anungji lenisüba khuret angateta parnoki nübortem den yariteptsüla” ta Media Cell sangdong nungsa shia lir.
“Kodang loktiliba ka nung taküm mapayulir, iba loktilibaji jenjang mali akümer. Tai maketba nisungtem taküm samaba atema Naga nungertemi ola adoker. Anungji, MLA temi nübortem timtemba aser okrongba angatettsüla aser parnok bilemdangtsü atemaa maongka magütsü shibanga meyudaktsüi, kechi inyaktsü tim’ar inyaktsüla” ta NTAC Media Cell sangdong nungsa metetdaktsüogo.
Ano külen Dimapur nung JCC co-convenor, Vekhosayi Nyekha-i ashiba agi, asüngnep 8:00 ako nungi nikongdang 5:00 ako tashi Dimapur mokdangtsü.
Tenokdangba kübok Police, district administration, medical personnel, postal service, Fire & Emergency Services, para-military, weddings, funerals, media, ambulance aser nija garitem nung shiranger anir senzürtembo maiter, ta JCC co-convenor-isa ashi.
Anogoshia nikongdang 5:00 ako sülen nübortem senzüsenbongtsü aser shishilembatsü lapoktsü saka sorkar garitem nokdangbabo magientsü, ta JCC-isa ashi.
Parnokisa ashiba agi, CBSE kübok school tem nung tatidang agütsürtembo menokdangtsü saka NBSE kübok aliba aser shisaliok rejutem ajak nokdangtsü.
Iba mokdang ya ‘democratic’ inyakyim ka lir anungji volunteer temi timi dang pei nem lemzüktsüba mapa inyaktsü aser mokdang kübok maitba nisungtem den yimya tajung benshitsü metetdaktsür, ta JCC-isa shisem.
JCC-isa sorkar mapa inyakertem dang kodamasüba timtem arema yariteptsü mepishia metetdaktsüogo.
Ao Senden-ia sangdong ka nung Hombar anepdang 6:00 ako nungi nikongdang 6:00 ako tashi Aor litsü mokdangtsü ta metetdaktsüogo.
NTAC aser JCC nati mapang züngzüktsüba süitemaka Chief Minister TR Zeliang-i pa mena aliba menden metoktsütsü ta tekong meranga nokdakba ajanga iba mokdang ayongzüktsüsa akümer, ta Ao Senden JCC Convener, A. Bendangnukshi Jamir aser Co-Convener, N. Bendang Jamir nati sangdong nung shia lir.
Tsünglanglen agüja alirtem tenokdangba kübok maiter.
Tatidang agütsür kaketshirtem; Examination duty atema Teachers/invigilators; Magistrate on duty; Police and Para Military ; Press and media personnel; aser Medical.