Modi-i Ato kilonser menden akhümket meraksatsüla: Shiv Sena

Mumbai, February 13 (Agencies): Tawa Ato kilonser, Narendra Modi-i taoba Ato kilonser, Manmohan Singh aitsüba dak sentakba nung tanü BJP-i aniba NDA teloktep nung dena aliba party, Shiv Sena-i Modi dang, nai tangar tzü chigoba mereprangtsüla aser nü office akhümket meraksatsüla, saka yimsüsüba nung rangloktsüla, ta ashi.
Shiv Sena indang osangkaket ‘Saamana’ ajanga Shiv Sena-i, “Uttar Pradesh nung nüboyimdang Modi-i, pa ket nung opposition party tem indang ‘horoscope’ lir ta ashi, aser ibaji langzüka Chief Minister Akhilesh Yadav-i, horoscope ji ajaki internet nung angati angur ta ashi. Nüboyim ya tashi sensamatsüba indang iba ya tatishitsü ka lir,” ta ashi.
“Ato kilonser aser Chief Minister-ibo lishi teploktsüba nung shilem magitsüla. Item menden nung akhümket lir, aser item menden atsünga alirtemi iba akhümketji wazüka ayutsüla,” ta Shiv Sena-i ashi.
“UP election nung kechi ataloktsü ali’ar ibaji ataloktsü (horoscope). Anungji Ato kilonseri Delhi nung aser Chief minister temi peipei state nung ang rangloker inyaktsüla. Tangar tzü chigoba mereprangtsüla,” ta ashi.
Tawa Modi-i, Congress yimsüsüba mapang ochimashi jenti liasü, saka Manmohan-i ‘raincoat’ semer tzü chigotsü meteta lir, ta aitsüba dak sentakba nung Sena-i iba o jembiogo.
“Yimtenren menden nung alirtemi opposition party tem anema inyakbaji yimtenren ochimashi den kasa lir. Ajisüaka item ajakji jakdaka inyakdar. Nüboyimdang Ato kilonser aser Chief Minister-i amokmerener, tayongzükba agütsür, sangdonger aser nangzüker. Koba temzüng kübok parnoki ibaji inyaker?” ta Sena-i asüngdang.
UP nung temzüng-ozüng mali, ta Modi-i Akhilesh aitsüba dak sentakba nung Sena-i, “UP nung temzüng ozüng tebilemtsü lira aser tetsürtem kümzüka melira state nungi BJP MP temi item onok atema kechi inyaker?” ta asüngdang.