India nung Hindu nunger nütsüng ajema kümdar: Rijiju

New Delhi, February 13 (Agencies): Hombarnü Minister of State for Home Affairs, Kiren Rijiju-i, India nung Hindu nunger nütsüng ajema kümdar, ta metetdaktsü.
“India nung Hindu nunger nütsüng ajema kümdar, kechiyong Hindu nungeri kodanga tangar par yimsü dangi memeyipdaktsür. Temeket nung aliba linük kar (Pakistan, China, Bangladesh) ama masü saka India nungbo minority tem züindar,” ta Rijiju-i twitter ajanga metetdaktsü.
Arunachal Pradesh Congress Committee-i osangkakettem ajanga, Narendra Modi-i aniba BJP sorkari Arunachal Pradesh ya Hindu state ka kümdaktsüner, ta aitsüba dak sentakba nung Rijiju-i iba o jembiogo.
Iba ama o jembiba atema Rijiju-i Congress aija, “Congress-i iba ama tejashitsü aketba o mejembitsüla. India ya secular linük ka lir. Yangi tamangba yimsü ajak sadoksadoka tesünep nung alir,” ta ashi.
“Congress-i iba ama o kechiba jembir? Arunachal Pradesh nüburtem telongjem nung ajak tsüngda tesünep nung lir,” ta ashi.
Rijiju ya Arunachal Pradesh nungi lir aser pa Buddhist yimsü amanger ka lir.
Ano külen Rijiju oji aija All India Majlis-e-Ittehadul Muslimeen (AIMIM) tongti, Asaduddin Owaisi-i, “Pa ya Hindu nunger atema dang masü saka India nunger ajak atema minister ka lir,” ta ashi.
Hyderabad nungi MP, Owaisi-isa, “Minister atema nai tezüngzüktep agiba tu bilemtettsüla,” ta ashi.
2011 Census nung ashiba agi, India nunger nütsüng shilem 79.80 bo Hindu nunger lir, Muslim nütsüng shilem 14.23, Khristantem shilem 2.30, Sikhs shilem 1.72, Buddhists shilem 0.70 aser Jains shilem 0.37 lir.