Tripura CM-i ketdangsertem dang nübortem ajurutsü ajungshi

Agartala, February 13 (Agencies): Tripura Chief Minister, Manik Sarkar-i civil service ketdangsertem dang, nübortem ajurua parnok tebilemtsü onüktem asüngdangtsüla, aser akok nungbo idangyongjisa parnok tebilemtsütem atema inyaktsütsüla, ta shiogo.
“Khenkhenbo ketdangsertemi official mapatem toktsür nübortem mapang aben ajurua parnok tebilemtsütem angadanga iba atemaji inyaktsütsüla, aser akok nungbo item tebilemtsüji iba tesem nungjisa tembanga inyaktsütsüla,” ta Tripura Civil Service (TCS) ketdangsertem dang Deobar aonung Sarkar-i ashi.
“Chief minister-i nübortem hopta ka nung asemben ajurutsü akoker süra, kechiba ketdangsertemi parnok hopta ka nung künüa majurutettsü,” ta TCS ketdangsertem 24buba biennial senden nung o jembidang pai ashi.
Tripura nung tongtibang TCS ketdangser parnok 325 shi lir, aser Tripura sorkar anitsü asoshi parnoki tongti shilem agir.
Sarkar shiba Tripura nung joko küm19buba Chief Minister inyaker, pai ashiba agi, ketdangsertemi aibelena tai kar inyaksem nungbo state sorkari ibaji tai atoktsü akok, saka parnoki asaa aibelen nungbo ibajibo temerenshi tesashi agütsütsü.
“Nenok mapa sorkar kilir ama masü saka lenir ka ama inyakang. Ketdangsertemi nübortem tejak repranga meinyaktsüla,” ta paisa ketdangsertem dang ashi.
State nung ali rongsen balala aser nübortemji state ajungkettsü aser nübortem ajangzüktsü asoshi tamshi shia timi amshitsü asoshi pai ketdangsertem ajungshi.
“Centre nung BJP ajanga Planning Commission anenba sülen state senotsü ren nung tetsükdaktsütem ajuruba indang jembishinütsü asoshi tasak kümogo. Planning Commission agienba sülen küm shia Centre nungi Tripura-i sen crore 1,500 nungi 1,700 agi tajemba angur. Senotsü agi anüngaka, tesem balala nungi sen apor state nung maparen balala inyakdar,” ta Sarkar-isa shisem.