Pakistan o China nati tezüngzüktep 20 shi zülutepa agiogo

Islamabad, August 13 (Agencies): Pakistan aser China nati dollar sen billion 20 shi jenjang aketba tezüngzüktep 20 shi agiba osang ka Pakistan sorkari tanü Brehostibar nü metetdaktsüogo.

Par linük anati China nung yashi, Bodbar nü tembanga amenba China Pakistan Economic Corridor (CPEC) Karamay-Xingjinga Forum nung tezüngzükteptemji zülutepa agiba osang jangjaogo.

Pakistan Ato Kilonser, Nawaz Sharif aser China Tir, Xi Jinping nati repranga alidang par ketdangsertemi energy, communication, social services, agriculture, health, education aser infrastructure nunger den sentakba tezüngzüktep ajungaji zülutepa agi ta Pakistan sorkari ketdang asüba Associated Press of Pakistan osangi metetdaktsü.

Pakistan nung sen inoka shishilembatsü nükjidong nung China nung tentetba company 35 tashi külemi lungjema shishilembatsü telok tasen ka tentetba osanga jangjaogo.

Taruba CPEC senden taküm October ita Beijing nung amentsü sentong renema lir.

“Pakistan-i CPEC mapatong asangsang nung mapa küma tejakelni bener aotsü temulungtetba lir,” ta shia, par linük ana tsüngda amalitep lia space technology tejakleni bener aotsü onük ka Pakistan’er Planning, Development & Reforms Minister, Ahsan Iqbal-ia tan senden nung benokba osang jangjaogo.

Tir Jinping-i taküm küm tetenzüklen Pakistan semdangba sülen par linük ana tsüngda CPEC senden amentsü sentong renem.