Cigarette aser moko chiyungtsütem nung sen atutsüla: WHO

Chennai, July 07 (Agencies): World Health Organisation (WHO)-i alima nung sorkar lenirtem dang taküm kümzüktsü asoshi cigarette aser tanga moko chiyungtsütem nem sen tuang, ta metetdaktsüogo.
Moko chiyungtsütem ajanga alima nung küm shia nisung lakh 60 shi tepseter, item rongnung shilem 20 bo India densema South-East Asia nung alirtem lir. Alima nung mokozü adokdakja moko achir shilem 25 bo iba tesem nung lir aser shilem 90 jungnüa mokozü madokba tanga moko achirtem lir.
Brihostibar nü WHO South-East Asia Region, regional director Dr Poonam Khetrapal Singh-i, mapatong akhanga inyaktsü aser moko achiba anendaktsütsü asoshi meranga inyaktsü nüngdaka lir, ta ashi.
Laisa, “Moko achiba ajanga timtem agütsüba anema nüburtem kümzüktsü asoshi saru inyakyim tajungba akumtsüla, ozüng takhangba benoktsüla aser moko achiba anendaktsütsü asoshi meranga inyaktsü nüngdaka lir, kechiyong iba ya tesem asoshi nübur anema alibaren tongtibang onük ka lir,” ta ashi.
Mongolbar nü WHO-i Global Tobacco Epidemic, 2015 osang sangdonga liasü.
Tawa asadangba ajanga ashiba agi, South-East Asia Region nung mokozü adoka moko achir crore 24.6 shi lir aser mokozü madokba tanga moko achir crore 29 lir.
Dr Poonam Singh-i ashiba agi, moko azüoktsü asoshi tongtibangtiba meraji, moko saru nung sen atutsüla. “Iba mera ajanga sorkar senpong aser nütsüng anema alibaren nung takok angutsü,” ta ashi.
Dr Singh-i sorkartem dang moko chiyungtsütem ajak nung sen atutsüla, ta ashi.
Tang sorkar timba kati mokozü madokba moko chiyungtsütem nung saru kanga ajema agir aser temzüng ajanga moko amshiyim ajakbo mayimjemer. Tesem nung oral cancer adokba tongtibangtiba kuliji mokozü madokba moko chiyungtsütem lir.
WHO-ia moko saru nung sen atutsü aser temelaba makai moko shishilembaba nokdangtsüla, ta shiogo.
WHO indang Global Tobacco Epidemic, 2015 osang ajanga ashiba agi, 2012 aser 2014 küm tsüngda Bangladesh, India aser Maldives linüktem nung cigarette nung sen tuogo, saka ano meranga inyaktsü aika anüngzüka lir.