Pakistan:Tehmina Janjua mezüng tetsür foreign secretary kümogo

Islamabad, February 14 (Agencies) : Hombarnü Pakistan linük nungi UN atema teti züngsem asütsü asoshi foreign secretary tasen, Tehmina Janjua shimogo.
Pakistan nungi iba ama mapa asoshi tetsür shimokbaji tan ya mezüng lir.
January 26, 2017 nü osangbenertemi ashiba agi, iba mapa asoshi linük Ato Kilonser Nawaz Sharif-i Janjua shimtsü kanga imla liasü.
Janjua-i March ita tetenzük nungi la mapa tasenba nung amdaka inyaktsü, ta Foreign office ajanga metetdaktsü.
La ya foreign secretary mapa nungi tang anensang, Aizaz Ahmed Chaudhry melena shimokba lir. Aizaz ya US ambassador asütsü asoshi shimba liasü.
Foreign affairs nung iba menden ya Pakistan nungi high commissioner to India Abdul Basit dena parnok lenir tajung aikati kanga raktepa liasü.
Osangbenertemi ashiba agi, Janjua-i la Foreign Service inyaktsü tenzükba mapang Soviet Union aser Eastern Europe nung inyakba dak alaka UN headquarter nung iba ama mapa tulu kodanga meinyakdang.
Sharif-i yaküm mei mapang Islamabad nung senden amendang nungi Janjua iba mapa asoshi shimtsü shia liasü.
Taoba mapang Pakistan nungi Itay ambassador inyaka alila, Janjua-i foreign office nung küm ana tashi otongdar mapa inyaka liasü.
La kinungbo Mansur Ahmad-a diplomat ka lir aser pa tang Switzerland nung oa inyaker.