O Panneerselvam-i Sasikala aitsüba obendang pela agizüker

Chennai, February 14 (Agencies) : Acting Tamil Nadu Chief Minister O Panneerselvam-i Mongulbarnü Supreme Court oshidang agütsüba pela agizükogo.
Tanü Supreme Court-i AIADMK general secretary VK Sasikala aitsü aser iba osang angazükba sülen Panneerselvam-i party MLA tem longjemtsü ayongzük.
‘Amma’ indang tanüla taküm lir. La tanüla agi asenok len anir, ta Panneerselvam-i pa pusemertem dang ashi.
“Ibaji tanü asenoki osang tajung angashiba ajanga asenoki kuli angur” ta paisa shisem.
Sasikala-i la pusema nungiter ta ashiba AIADMK MLA tem dang Panneerselvam-i mangatettep angatetteptsü ayongzük.
“Nisung ajaki mangatettep amadokdi aser longjemdi” ta paisa ashi.
Paisa, party züngsemtem dang yimjung nung alitsü aser Jayalalithaa-i inyakba mapatem maneni inyaka aotsü ta ashi.
Tanü Supreme Court-i VK Sasikala ochimashi ken o nung aitsü aser la küm 4 tepuokdak ayutsü atema obendang agütsü.
Iba ajanga lai Tamil Nadu nung Chief Minister inyaktsüba mapa anentsüogo, kechiyong SC-i la taruba küm 10 atema election nung shilem magitsü tenokdangba agütsüogo.
Tanep 10:30 ako meta Supreme Court nung obendanger anati oshidang balala agütsü, saka tenaprongi 1990s tetenzüklen Sasikala-i Jayalalithaa den yaritepa ozüng alema rongsen aika benden ta aitsü.