Tetsür kaketshir kati Modi dang NE otsütem sayutsü atema shidi zülu

Jaipur, February 14 (Agencies): Linük nung kaket shisatsü angazükba rejutemi amshiba ‘History’ kakettem nung Northeast tesemtem indang putiotsü inoka tesayuba agütsütsü asoshi arishi küm 12 tain, Aaira Goswami-i India Ato Kilonser, Narendra Modi dang temepishiba shidi ka zülu.
Aaira ya Assam nungi lir aser la tang Jaipur nung azünger. Lai azüngba kaket nung India tesem balala nung atalokba otsütem züngshir saka Northeast tesem nung atalokba otsütem mezüngshiba ajanga, iba mapa ya Ato Kilonser-i akoktsü südi, ta bilem.
“Ni India nung putiotsü timbaka metetogo; Jammu & Kashmir nungi Tamil Nadu tashi, Mughal nunger mapang nungi British nunger mapang tashi, Rajasthan nungi Kolkata tashi, saka ‘Seven Sisters’ indang otsütem kong sama? Kaketshir aikati ‘Seven Sisters’ ji kechiar memetet. Northeast indang kü kaket nung angutsü kanga tasak. Ni ozü state, Assam aser Northeast otsütem kü kaket nung züngshi asübo, kü pungmang asangsang akümer amai asütsü,” ta lai zülu.
Aaira ya Neerja Modi School nung azünger aser India Ato Kilonser-i Northeast putiotsütem tarutsü nungi kakettem nung inoksemtsü asoshi maparen balala inyakba kisüng masü saka Modi-i la dangi iba telangzüba shidi yoktsü imlar, ta lai zülusem.