Nagaland IAS, NCSA aser NSSA teloktemi sorkar office tem lapoktsü mepishir

Dimapur, February 14 (Agencies) : February 14, 2017 nü Kohima nung Nagaland IAS Officers’ Association, Nagaland Civil Service Association (NCSA) aser Nagaland Secretariat Service Association (NSSA) teloktem ajurutepa tang state tensa dak sendakba tebilemtsütem lemsatepa liasü, ta NCSA Tir, Kevekha Kevin Zehol, NSSA Tir, Johnny Humtsoe aser IAS Association Tir, Sentiyanger Imchen nungeri sangdong ka ajanga metetdaktsü.
Mapang agia tatsü talang ajak kanga junga asadanga jembitepba sülen, taoba hopta ana tashi state rangben nung sorkar office tem shibanga ayuba ajanga meyiper nüburtem ang akoksar amai telok asemprongi bilemba, sangdong ajanga ashi.
Anungji nüburtem mechi nung onok telok asemi senteper lenirtem dang sorkar office tem tekaratiba nung lapokdaktsü nung ajungtsü ta mepishir.
Iba den külemi nübur ajaki sorkar oset kümzüka yudaktsüner ta onoki nüburtem dang mepishir, kechiba süra sorkar ket nung yua aliba oset ajakji nüburtem meyong aser asen nüngdak asoshisa lir, ta sangdong nungjisa shia lir.