Mokokchung nung mokdangba sentong süngjema takok ngua liogo

Mokokchung, Feb 14 (TYO): February 14 nüa Nagaland tesem balala den külemi Mokokchung nunga Ao Senden JCC-i ayonga anepdang 6:00 ako nungi nikongdang 6:00 ako tashi mokdang sentong süngjema takok ngua liogo.
Iba mokdang sentong nung Ao Senden kübok tzükong balala den Mokokchung nungi telok balala; aser ano Eastern Nagaland People’s Union Mokokchung, Sumi community, Gorkha Community-ia maparen balala nung yaritepa liasü.
Feb 15 (Bodbar) anogojia kasa iba mokdang sentong anepdang 9:00 ako nungi nikong 3:00 ako tashi alitsü, ta Ao Senden JCC-isa metetdaktsüogo. Mokdang küboki maitertemji akhi sangdonga aliba ama alitsü.
Mokokchung district nung tatidang agütsür kwi lir, “nenok senzüsenpongba nung kecha timtem magütsütsü, anungji, meratai takok angutsü meranga zünger agüjang”, ta Ao Senden JCC-isa ayongzüka metetdaktsü. Tatidang agütsürtem dak timtem kar danga ajurura, item mobile phone nung (9865073008/9436436089) nung tongteprateptsü akok, ta parnokisa shisem.
Mokokchung Town Pastors Fellowship-i ayongzüka tang Nagaland tensa tia atema sarasadem sentong ka Feb 16, 2017 nü Mokokchung police point nung anepdang 6:00 nungi 7:00 tashi ayongzüka lir. Iba sentong nung amangbapur ajak arua shilem agitsü parnokisa ayongzüka metetdaktsü.