NTAC/JCC külem senden nung telemtetba agibatem metetdaktsür ; Anepdang 9:00 ako nungi nikongdang 4:00 ako tashi mokdangtsü

Dimapur, February 14 (TYO) : February 8, 2017 nü APO Hall Kohima nung Kin Hoho ajak den NTAC/JCC coordination meeting alidang tang nübortemi inaykba mapa ya NTAC/JCC ajanga ketdangsüa inyaktsü tashi agütsüba/mapa nungloktsüba nung ajemdaker, January 14, 2017 nü NTAC/JCC joint meeting ka amendang telemtetba kar agiogo, ta JCC media cell sangdong ka nung metetdaktsü.
Senden nung Kin Hohotem dang February 17, 2017 tashi nung pei pei kin nungi MLA tem dang T.R Zeliang pusema nungitba meyipa agitsü aser iba tetuyuba sülen manidakba candidate tem taruba election nung pei kin litsü telungi maitdaktsütsü tenokdangba agüjang ta tuyutsü lemtet, ta JCC Media Cell-isa metetdaktsü.
NTAC aser JCC nati lanurtem aser volunteer tem akokba tashi azüoktsü meranga arur saka parnoki joko maremteter. Anungji, iba ama mapang ka nung kodamasüba lendong kar danga atalokra, iba tebilemtsüji Sorkar aser Angh nati abentsü, ta tanü senden nungsa lemtet.
Senden nungsa mokdang mapangji anepdang 9:00 ako nungi nikongdang 4:00 ako tashi asütsü lemtet aser duty nung senzüba police garitem dak alaka sorkar gari ka danga mesenzüdaktsütsü lemtet.
JCC-isa exam duty nung senzüba garitem nung kaketshirtem anir dang senzüdaktsütsü bangzünga renem. Iba nung kaketshirtem meiner aoba garitem tazüng meyipa meyoktsü saka parnok tatidang agütsüdak anena ayutsü aser kaketshirtem tatidang temer ang mener tanaben yoktsü lemtet. Maneni, sorkar garitem nung kaketshirtem anir mesenzüdaktsütsü ta telemtetba agi.
JCC-i telecom operators dang data aser internet services lapoktsütsü tetuyuba agütsür mesüra timtem ajurutsü ta tetuyuba agütsüogo.
Mokdang mapa nung terata madokdaktsütsü atema volunteer tem pei mapa lemzüktsüba tesem toktsür tangaleni maotsü atema tanü JCC-i telemtetba agi. Ajisüaka, JCC media cell nübotem aser parnok indang garitembo senzütsü, ta JCC media cell sangdong nungsa metetdaktsü.
Nagaland GB Federation-i Dimapur nung consultative meeting ka amentsü asüngdang saka state nung tensa mejungi aliba ajanga iba sendenji mementettsü ta JCC-i ashi.
February 15, 2017 nikongdang 1:00 ako nung JCC aser DUCCF tsüngda Chakhesang community Hall nung joint meeting ka amentsü anungji iba senden nung adenertem mokdang kübok maitdaktsütsü ta JCC media cell-isa metetdaktsüogo.