Priyanka-i Amethi nübur majuruteter: Irani

Kanpur (Uttar Pradesh), February 16 (Agencies): Tanü Brihostibarnü Union Minister aser BJP lenir, Smriti Irani-i Priyanka Gandhi aija, Congress leniri Amethi nung nübu meyimtsür, kechiyong lai nüburtemi tasüngdangbatem majuruner, ta ashi.
Kanpur nung Union Textiles Minister, Irani-i election nüboyim sentongtem aser osangbenertem den jembia liasü, aser iba mapang nung la dang, party sorkar tashii arura na chief minister candidate asütsü asü ta asüngdang, saka lai odiodia telangzüba magütsü.
Iba telangzüba agüja lai, BJP nung inyaker ajaki Uttar Pradesh nung party nem sorkar kümdaktsüner, ta dang langzü.
Union Minister Irani-isa, 2014 küm Amethi menden nungi Lok Sabha election nung lai Congress lenir, Rahul Gandhi matsüngdang tamakok nguaka lai iba constituency nüburtem atema inyaktsür, ta ashi.
Laisa, Priyanka Gandhi-i Amethi nung election atema nübo yimtsütsü atema mao, kechiyong tenangzükba aika parnoki meinyak, ta ashi.
“Priyanka-i nüburtemi asüngdangbatem majangshiner,” ta laisa ashi.
State nung Samajwadi Party-Congress loktepba ajanga BJP jenjang mejungi akumer asü, ta asüngdangba langzüdang lai, Chief Minister Akhilesh Yadav-i parnok (SP) kijai takok mangutsü ta bilemba ajanga pai Congress den loktep, ta ashi.