Moko chiyungtsü ajak ‘demerit goods category’ nung dendaktsütsü Union Minister Jaitley dang akhanger

Mumbai, February 16 (Agencies): Goods and Service Tax (GST) Council senden atongtsü lia public health group temi Union finance minister, Arun Jaitley dang moko agi yangluba chiyungtsütem ajak, talisa bidis (biri) ‘demerit goods category’ nung dendaktsütsüla aser moko nung saru liromedema agitsüla ta takhangba agütsüogo.
July 1 nungi tenzüktsü aliba indirect tax nung biri densema moko agi yangluba chiyungtsü ajak nung saru aika meshitsüla, ta Public Health teloktemi sangdong ka ajanga metetdaktsü.
Küm shia moko achiba ajanga linük nung nisung lakh 10 asür, aser iba tebilemtsü atema sorkar saru inyakyim ajanga kangabo meinyaker, ta parnoki bilemer.
Cigarette nung saru shilem 53, biri nung saru shilem 19.5 aser mokozü adoka machiba mokotem nung shilem 56 agir.
World Health Organisation (WHO)-i benokba den medemdangra, India nungbo moko chiyungtsütem nung saru kanga ajemer, ta parnokisa ashi.
WHO-i ashiba agi, moko chiyungtsütem nung retail price nungi saru ji tajemba agi shilem 75 asütsüla.
India nung kanga bulua achiba mokoji biri lir, aser moko achirtem shilem 64 bo biri achirtem lir. Alima nung moko achir timtiba jenjang tanabuba nung India (nisung million 275 million mesüra India nunger tain shilem 35) lir. Item rongnung moko dak sentakba chiyungtsü balala ajanga linük nung küm shia nisung tajemba agi lakh 10 asür.