Kim Jong-nam tepsetba atema ano nisung ana puogo

Kuala Lumpur, February 16 (Agencies) : North Korea lenir Kim Jong-un teno. Kim Jong-nam tepsetba ken o nung ano temulung melemteti bilemba nisung ana pua lir, ta police-i metetdaktsü.
Iba ken o dak sendakba nung tang tashi nung nisung asem puogo, ta osang ajanga ashi.
Arishi küm 46 tain, Kim Jong-nam ya Hobarnü Kuala Lumpur International Airport, Malaysia nung tayimtsü ataba mapang tetsür anati miim chidaktsür südaktsü asütsü ta temulung melemi bilemer.
Iba mapa inyakba atema temulung melemi aliba mezüng tetsürji Bodhbarnü apu. Iba tetsürlaji arishi küm 28 tain, Doan Thi Huong lir ta jangjaogo. La ket nung Vietnam passport ka liasü.
Tetsür tabulaji Brihostibarnü apu aser la ket nungba ano Indonesia passport ang ka liasü. Laji arishi küm 25 tain, Siti Aishah lir ta jangjaogo, ta police sangdong ka ajanga metedaktsü.
Tena prong ya tayimtsü anenba tesem nung CCTV camera nung tangoka aliba video ajanga putet.
Siti Aishah ya tetong ta temulung melemi bilemba Malaysia nunger ka Bodhbarnü aonung apuba sülen apu.
Inspector General of Police, Tan Sri Khalid Abu Bakar-i, iba teburji arishi küm 26 tain Malaysia nunger lir, ta ashi.
Selangor police chief Datuk Abdul Samah Mat-i, “Paji shitakba temulung melemtetsangjibo masü. Tetsür tanabula aputsü atema osang tejangja aginüba ajanga onoki pa sota ayu. Pa ya la tetong lir,” ta ashi.
“Pa apuba ajanga tetsür tanabulajia onoki pua arutet,” ta pai shisem. Tetsür ana ya ozüng kübok anogo tenet nü pua ayutsü.
Kim ya Macau-i aotsü lia Kuala Lumpur International Airport nung miim chidaktsü. Pai teyari meshi aser mozü kidangi bener tuodak nung lenmang tom nung asü.
Bodhbar aonung pa temang sensaa reprangba maparen ajak tembangogo, ajisüaka police-i iba osang tejangja ano metetdaktsü.
North Korea-i Malaysia nung Kim temang sensaa mereprangdaktsütsü ashi, ajisüaka Malaysia-i kecha merendaki pa mang sensaa reprang, ta Malaysia police ketdangser tejen kati ashi.