Ashton Kutcher-i tanurtem dak teim mesüi benshiba anendaktsütsü asoshi akang

February 16, 2017 (Agencies): Actor aser ‘human rights campaigner’ Ashton Kutcher-i tan hopta U.S. Senate jakdang kanga dang temolung shiranga kuli agütsüogo. Pai ozüng yanglurtem dang tanurtem dak tashiyim benshiba (sexual exploitation) anendaktsütsü asoshi ozüngyanglurtem dang ozüng kar yanglua yaritsü asoshi mepishi.
Kutcher ya ‘Thorn’ nung mendenbuba lir, aser iba lokti ajanga alima ajunga nung tanurtem dak tashiyim inyakba anema raratsü asoshi ‘technology’ balala yanglur. Parnoki ‘software’ balala yanglur aser ibaji ajanga yamala tashiyim amshia kangshia aliba nisungtem bushiba nung yarir.
‘Thorn’ nung mendenbuba ama küm 39 tain actor-i Mongolbarnü Washington nung U.S. Senate Foreign Relations Committee dang sorkar aser loktitemi item amala tashiyim amshia kangshidakja alibapurtem tenüng nung nokdaka yaritsü asoshi mapang tongogo, ta ashi.
“Nisung aika pela alitsüba temetenjii ‘rape’ südaktsüba aser tashiyim agi mezüngmeshiba agi agienogo,” ta Kutcher-i ashi. Tashiyim amshia nisung raksatsüba aser yamala lendongbang nung aliba nübortem jangjatsü asoshi technology tasen nüngdaker, ta paisa ashi.
“Technology balala ajanga nisung ka alar tiai idaktsütettra, ibaji ajanga alar tia nungi atsütettsü koka lir. Asenoki parnok dang nungi yamala tim masüba yimyatem anema raratsü asoshi hadir tajungba meyanglutettsü masü no?” ta pai asüngdang.
Kutcher, shiba külem actor Mila Kunis den kibong aküm, tena tanur ana sosema lir. “Ozü tanur den küm kasa shi tanur ka America nunger ‘sex tourist’ kati Combodia nung ‘rape’ asüba video ni nguogo. Tanutsüla ya la meketa aliba yimya tesayuba nung kanga tera yangadoker la rape asübaji asayar amai bilemba nguogo,” ta Kutcher-i shisem.
“Onok ya yamala nokdangtsü asoshi tatembangbuba teimla lir. Taoba mapang nunga ketdangsertemi ‘Thorn’ dang online nung tim mesüi inyakertem bushitsü asoshi teyari meshia liasü. Iba ya kü mapa, aser ni marakzüi inyaktsü,” ta pai maneni ashi.