Actor Shahid aser Saif na kanga junger: Kangana

Mumbai, February 16 (Agencies): Rangoon nung külem actor Shahid Kapoor aser Saif Ali Khan na ya kanga dang actor tajung aser tena den film ka nung külemi shilem agibaji la asoshi maongka ulura, ta Actress Kangana Ranaut-i ashi.
Rangoon ya alima rangben tanabuba rara mapang atalokba temeimteper otsü ka lir, aser iba film nung par asem külemi shilem agir. “Tenaprongla kanga dang actor tajung lir, aser Vishal Bhardwaj Sir (director)-i film nung tena atema kanga dang shilem tajung lemzüktsüogo. Ni parnok ama actor tajung den inyaktsü asoshi maongka anguba atema kanga tia kaa bilemer. Ni Saif Omkara nung Langda Tyagi ama shilem agiba, aser Haider film nung Shahid indang shilemtem kanga jangra atemer. Tenati Rangoon film nunga taoba film tem nung ama kasa shilem tajung agir,” ta Kangana-i ashi.
Bhardwaj tenüngsanga küm 29 tain actor-i yamai ashi, “Pa kanga dang tasütait. Shingaia yamala otsü yanglutsü asoshi mebilemtsü. Rangoon ya alima rara rangben mapang nung temeimteper otsü ka lir, aser yamala tensa ka nung temeimteper otsü ka yanglua sayutsüji film yanglur tem aikati tasümaittsü. Tangari meinyakdangba aser meimlaba mapa inyaktsü asoshi pa dak tejangraba ka lir.”
Kangana ‘Queen’ aser ‘Hunterwali’ movie tem nung shilem agir. La ‘Hunterwali’ film nung kanga tasüita shilem agiba tang tashi bilemteter.
Iba film Feb. 24 nü sayatsü.