Iran Foreign Minister, Zarif-i Pakistan semdanger

Iran foreign minister, Javad Zarif-i tanü Brehostibar nü Islamabad yimti tonga aoba sülen Pakistan National Security Advisor, Sartaj Aziz (Achijilen)-i Zarif den teka amtepa ajuruba noksa nung angur. (Islamabad, August 13)

Islamabad, August 13 (Agencies): Iran foreign minister, Mohammad Javad Zarif-i tanü Brehostibar nü Pakistan semdangogo.

Zarif-i tanü Islamabad yimti tong aoba sülen Pakistan Ato Kilonser, Nawaz Sharif aser pai aniba Pakistan lenirtem den ajurutepa senden balala amenba osanga angazükogo.

Par linük anati inyaktur anena aliba Iran-Pakistan gas pipeline tanaben yanglu tenzüktsü onük ka Zarif-i tanü Sharif den benoka liasü.

“Ni tanü Sharif den ajurutepa senden amendang ozü linük anati yanglutur aliba Iran-Pakistan gas pipeline tembanga yanglutsü nükjidong nung kasaji tanaben yanglu tenzüktsü onük benoka jembiogo,” ta Zarif-i tesülen osangbener den ajurutepdang metetdaktsü.

Pakistan nem nungdakba energy teyari agütsütsü nükjidong nung iba gas pipeline ya yanglu tenzük saka Iran-i par nuclear mapatong takok ngua inyaktsü asoshi iba pipeline-ji amshitsü akok ta US-i temulung malemba olen ka metetdakja pipeline yangluba maparen anentsütsü ajungshia liasü.

Ajisüaka, alima tashi abenba linük lenirtem aser Iran na tsüngda nuclear tezüngzüktep takok ngua agiba yong par linük anati anendaka aliba gas pipeline-ji tanaben yangluaka tetsükdakba kecha majurutsü ta Zarif-i metetdaktsüogo.

Iba pipeline yanglutsü asoshi Iran-i tanü tashi nung dollar sen billion 2 tashi inoka mapa inyaka lir saka Pakistan-ibo par tsüda pipeline yanglutsü maparenji tanga metembangi lir.