NPF-i govt. tenzükertem amokmerenbaji taoksatsüka: JCC

Dimapur, Feb. 16 (TYO) : Tang nübortemi Nagaland Chief Minister menden nungi alung ta takangba agüja mokdangba sentong nung government tenzükertemi shilem agibaji T.R.Zeliang-i aniba government anema inyaker, anungji tapet temerenshi agütsütsü ta NPF teloki amokmerena sangdongbaji taoksatsüka aser maksütsü o lir ta Joint Co-Ordination Committee-i metetdaktsüogo.
“Nübortemi nenok kiburji maginer, anungji Naga nunger anemer ka mesüra NPF pur dena Naga nunger ajaki tang nübortemi ayimtenba mapa nung ya shilem agitsüsa khuret tulu lir, aji mesüra NPF nung inyakertemjia Naga nunger anemer akümtsü,” ta JCC sangdong ka ajanga metetdaktsüogo.
Tanü Brehostibar nü T.R.Zeliang-i pa Delhi nungi maru tashi atema anogo ana mokdangba sentong agiendaktsüner ta NTAC aser JCC dangi mepishia züluogo saka pa ama ka dak joko tamang makar aser tanaben mekülaokdaktsütsü, anungji pa menden nungi malu tashi tang mokdangba sentong ya manentsü ta JCC-isa metetdaktsü.
Tang ama Nagaland government mali ama kümer alidang Nagaland angh-i state nung tekolak ka ama masü saka yimten nung inyaker ka ama dang sayua T.R.Zeliang pusema nokdakbaji state nung tekolak memesük ta JCC-isa metetdaktsü.
Tang ama nübortemi timtem jenti agia mokdangba mapang NBCC lenirtem Kohima nungi aluagi JCC purtem asoshi sarasademtsüba asoshi pelar aser ano Sumi Students’ Union Dimapur purtemia tatidang agütsür kaketshirtem asoshi angati bus agütsüba asoshi pelar, anungji item bus garitemji reprangteta malensertemi yoktsüla ta JCC-isa metetdaktsü.