NPF-i sorkar senotsü aser nijai tenlaba bendangtsüla: AYO

Dimapur, February 16 (TYO): NPF-i aniba sorkar kübok NPF Central-i, sorkar mapa inyaker kari iba mokdang atema senotsü agütsür ta aitsüba aser sorkar mapa inyakertem dang tapet temerenshi agütsütsü ta amokmerenbaji kanga temenünütsüka lir, ta tanü Angami Youth Organisation (AYO) Tir, Neinguvotuo Krose aser General secretary, Kekhrie Pfukha nati sangdong ka ajanga metetdaktsü.
“Iba mapatong atema sorkar senotsü mesüra yimtenren lenir shinga nungia senotsü agia mamshi ta AYO-i jangjashitsür. Iba dak alia NPF-i sorkar senotsü aser nijai-i tenlaba na bendangtettsüla. AYO-isa NPF dang, nüburtem mapatong o nisung kar longkak aitba na bendangtettsüla ta ashir. Nüburtem mapatong nung NPF Central nungi nisungtemi shilem magiba ajanga parnokji Naga nunger anemertem aser democracy anemertem lir ta sayur,” ta AYO sangdong nungsa shia lir.
“NPF-i, NTAC aser JCC-i nüburtem libaliro timtemdaktsür ta aitsüba dak sentakba nung, shirnoki nüburtem timtemdaktsür’ar nüburtemi junga meteta lir. Itasen magütsüba, PDS ochimashi ken o, totzü tanga den meyoktepba ken o, Wokha nung totzü tazü auyatsü merangertemji shirnok’ar Naga nungeri meteta dang lir,” ta parnokisa ashi.
“Nüburtem mapatong nung sarasadem, nübo aser senotsü agi yarir kija aser tentettem, aser talisa sarasadem aser lumiba ajanga yarir ajak dang AYO-i pelar,” ta AYO-isa metetdaktsü.
“NPF Central office ketdangpurtem aser parnok indang tanga agency temi AYO züngsemtem mesüra benefactors maneni aitsüra AYO-i mashi anogo nung bushitsü aser züngsemtem kümzüktsü atema tapet inyaktsü ta tekümdangtsü metetdaktsür,” ta kasa sangdong ajanga metetdaktsü.