Pakistan-i Afhganistan jaoker kiralongrar 76 tenüng agütsü

Islamabad, February 17 (Agencies) : Kiralongrartemi Pakistan mapang aika nung amakba sülen Pakistan sepaitemi Afghanistan nung atsükoka aliba kiralongrar nisung 76 tenüng tarensena zülur Hokolbarnü Afghanistan embassy nungi ketdangsertem jaoka agütsü.
Par linük nung kiralongra mapa inyakertemji Afghanistan nung aliba telungpurtem asütsü ta Pakistan-i temulung melemi bilemer.
Deputy Head of Mission aser Afghanistan embassy nungi ketdangser tangartemji Pakistan Rawalpindi nung aliba Army headquarters-i jaoker kiralongrartemi Afghanistan linük amshia Pakistan amaktsü sentong yangluba Inter Services Public Relations-i metetdaktsü, ta osangbenertemi ashi.
Afghanistan nungi ketdangsertem dang item kiralongrartem dak teinyaktsü tim inyaktsü ashi aser yamaji mesüra parnok pua Pakistan nem agüjang ta Pakistan-i shiogo, ta osangbenertemisa ashi.
Brihostibarnü Sindh province kübok Sehwan yimti nung Sufi tekülem kidang tapoktsü poklokja nisung 75 asüba aser nisung 300 yirutsüba lendong dena hopta tsüngda nung kiralongrartemi Pakistan ishiben amakba sülen parnoki item tenüngtem nguteta Afghanistan nem agütsü.
Tekülem ki, Lal Shehbaz Qalandar nung tapoktsü pokloktsübaji Islamic State (IS)-i tenüng agiogo. Lal Shehbaz Qalandar ya 13th century mapang Muslim amanger rongnung ajaki tushia aser akhümtsübua aliba temeshi nisung ka liasü.
Kiralongrartemi tang Pakistan amaktsü asoshi Afghanistan arrtsülen nungi mapa inyaker ta security ketdangsertemi bilemer.
Brihostibarnü tapoktsü lendong atalokba sülen lendong nungi kümzüka alitsü asoshi Pakistan-i Afghanistan den arrtsü, Torkham tesem shibanga ayu.
Bodhbarnü Foreign Office-i Afghanistan nung amenoka aliba Jamaatul Ahrar anema kuli kar agütsüogo. Ahrar ya 2014 küm TTP nungi razüka ao aser tang parnok Daesh mesüra IS telok den sendaktepa lir.
Pakistan aser Afghanistan na sentep arrtsü kilometre 2,600 lir. Item tesem timba ka arokaba agi sünga lir aser sepaitemi Afghanistan sorkar dang arrtsülen tim masü mapa inyakertem nokdangtsü asoshi amalitepa inyaktsü mepishi.