Arishi küm 3 tanur ka pua bener aoba Silchar nung kümzük

Silchar, February 17 (Agencies): Cachar district nung aliba Lakhipur subdivision kübok, Labakpar yimtsüng nungi arishi küm asem tanur, Shamim Ahmed Laskar, Hombarnü pua bener ao aser iba tanur ya Silchar railway station nung Mongolbar aonung ngutetogo.
Shamim ya prangbong bener nisung telok kati tetsü ket nungi rakzüka bener ao, ta police tanishir kati ashi.
Cachar police ketdangsertemi district nung aliba police station ajak nem iba osang metetdaktsü. Iba mapang, tanur pua bener aor nisungtemi tanur tebu, Saharul Hussain Laskar dangi phone asü aser par tanur agizüktsü asoshi sen lakh 10 meshi.
“Item nisungtem yagi Shamim ya train nung bener aotsü asoshi train ataa liasü. Ajisüaka GRP temi iba tanur ya angu. Iba mapang nisung apurtemji ajen aser Shamim kümzük,” ta SP (Cachar), Rakesh Raushan-i Bodhbarnü metetdaktsü.
Police aser GRP külemi bushiba mapang, nisungpur rongnungi arishi küm 35 tain, Rabijul Barbhuiya railway station anasa apu.
Lakhipur Police Station nung aliba police temi iba nisung ya Lakhipur indang subdivisional judicial magistrate dangi anir oa ken-o benokogo.
Iba sülen Rabijul ya Lakhipur Police Station nung asüngdangya süogo.
“Tanüngba nisungpurtem aputsü asoshi police temi bushisüngdang sudaki,” ta SP ajanga metetdaktsü.