Sarasadema mokdangba

Tesüiba kümtem nung Nagaland nung aiben telok balalai mokdangba sentong ayongzüka aruba metetogo, ajisüaka tang amai sarasadem mapang agir mokdangba sentong tenzükba aser atembabo majuru aser mangashidang. Aji oda, mokdanga alidak lenjem balala nung sannükertemi sarademtsür sentong tenzükba aser arogo lenirtemi nübortem dang sarasademtsü ayongzükba mapatem yagi Naga nungertemi Tsüngrem jak bushiba kuli ka sayur. Atangji, asenok ajaki election mapangbo Tsüngrema mali ama aser arogoa tenteta maka ama Tsüngrem aser alima ozüng anema inyakogo. Aji oda, yimsüsürtemia ozüng latettertem memesük Tsüngrem aser nübortem anema pei inyaknütsü inyaka arur. Item temenentem agi tang asenok kangshir, anungji sarasadem masütsüla masü asenoki asenok aotsüba lenmang mangu kümogo. Iba tangatetba nung ano Nagaland ajunga nung tanü aser asüng na Baptist arogotsürtemi tesem ajaklen asen lima atema sarasademtsü ayongzüka lir. Iba sarasadem sentong nung mokdangba tesem tonga oagi arogotsürtemi volunteer-tem den külemi sarasadem mapang agitsü shia lir. Aji oda, iba jagi tang mokdangba sentong ya alima meimchir lokti tongpang ama ka dangbo masü saka tanülar tongpang ka kümogo. Iba tongpang ya municipal aser town council election magidaktsütsü nokdangba nungi tenzük aser tangbo T.R.Zeliang Chief minister menden nungi alutsüla ta akangtsüsa kümogo. Item tatalokba ajak nungji asenoki mangatetter dang ashi, Tsüngremer sentong dena lir, ibayongji sarasademtsüba ya kanga tongtibang akümer. Atangji, yimten asünungji political party-temi pei telok aser pei nisung pu asemtsüsa adoker, ajisüaka sarasadem sentong nung yabo ajak adentsüla aser kechi shitak aser kechi ochi idakji azüittsüla. Asenoki ochi mulung agi sarasademra asenok dang Tsüngremi shiba chief minister masütsüla aser shibabo asütsüla, ibaji ashitsü. Asenoki dang Tsüngrem dak amanga sarasademra asenok asoshi government tajungba ka Tsüngremi agütsütsü. Asenoki amangba Tsüngrem ya Mosa aser Yihusa leniba kübok Israel nungertem aniba Tsüngrem, tila tanur David chuba kümdaktsüba Tsüngrem aser tamaren chuba Nebukednezar ai mejaka senzüdaktsüba Tsüngrem lir. Pai asenok menen yari asenok kangshitsü koka lir aser ano asenoki dang asenok temulung shilanga arua sarasademra Pai asenok dang taochi tulu sayutsü koka lir. Tang ya Nagaland nung yimsüsürtem mangmangteper aser nübortem shisabolua ain adoker. Tetsüngda nungji kecha mali saka lendongang ano tuluba ataloka aotsüsa angur, anungji yimsüsürtem o nübortem na tsüngdaji Tsüngrem taochi maitra Naga nunger o Naga nunger na tsüngda oshi mangatettepi akümtsü. Atangji, asenoki iba ama timtem lendong aser shisabolu mapang nung ya Tsüngrem dang shisatsü meshia inyakra, asen lima, asen lokti aser asen yimten merüktetba mapang tajung ka küma asenoki inyaktettsü. Aji oda, sarasadema inyaktsüba dak alaka, tang amai yimten aser lokti tajungba küma yanglushitsü nükla nung nübortem den arogoi dena sarasademja shilem agidang, shingaia shinga tsübudakja tashiyim mamshitsüla, shingaia shinga mesüzüka senotsü mamshitsüla, shingaia shinga dang pei tangatetba yoka machitsüla saka ajaki kechi shitak aji inyaktsüla. Joko, tang Nagaland ajunga nung mokdangba sentong ya tanülar tongpang kümogo, anungji nokdakbo asenok nokdaktsü saka asenok asoshi Tsüngremi raratsütsü. Iba tamang aser teimla nung arogo nunger aser arogotsür shiai pei lima aser pei yimten tajung küma yanglushiba nung shilem agitsüla. Iba tongpang ya ULB election magidaktsütsü nokdangba tongpang mesüra chief minister melendaktsütsüba tongpang dang masü saka Nagaland nung ochimashi anema raraba tanülar tongpang asütsüla. Aji oda, chief ministerbo asüng melentsüa akok aser municipal act-a nübortemi aginüba ama melenshitsüa akok, saka idakji iba tanülar tongpang ya matemtsüla, kechiyong iba tongpang yabo ochimashi anema yimdong nung dena sarasadema  raraba tanülar tongpang ka kümogo.